काठमाडौंको गोकर्णेश्वर नगरपालिकाका उपभोक्ता समितिका अध्यक्षसहित तीन जना घुस रकम सहित पक्राउ परेका छन्।
अख्तियार दुरूपयोग अनुसन्धान आयोगले बुधबार वडा नम्बर ३ स्थित राजाडिल सडकखण्ड मर्मत तथा निर्माण उपभोक्ता समितिका अध्यक्ष लक्ष्मण अधिकारी, सदस्य मोहनप्रसाद कुइकेल र बालुवा डिपो संचालक सुशान्त कुँइकेललाई पक्राउ गरेको हो।
उनीहरूले निर्माणको काम सकेपछि समितिमार्फत भुक्तानी हुन बाँकी रकम भुक्तानी दिनेक्रममा घुस माग गरेको भन्ने सूचना अख्तियारले पाएको थियो।
उक्त उजुरीको आधारमा खटिएको टोलीले उनीहरूलाई एक लाख घुस लिइसकेको अवस्थामा पक्राउ गरेको हो। यस्तै ३० हजारको चेक पनि बरामद गरेको छ।
