दैलेखको सामुदायिक वनमा आगलागी हुँदा घाइते भएकाहरूको उद्धार गरिएको छ।
आठबिस नगरपालिका–६ मा रहेको सल्लेरी सामुदायिक वनअन्तर्गत माल्यामा भएको आगलागीमा परी १० जना घाइते भएका थिए।
तीमध्ये पाँच जनाको अवस्था गम्भीर रहेको जिल्ला प्रहरी कार्यालय दैलेखका प्रमुख प्रहरी नायब उपरीक्षक किशोर लम्सालले जानकारी दिए।
उनीहरूलाई हेलिकप्टरमार्फत् नेपालगञ्ज लगिएको छ।
उनका अनुसार घाइतेहरू सबै आठबिस नगरपालिका–६ का हुन्। बसुन्धरा विक, नवीन विक, नैना विक, भैरे विक र प्रजा विक गम्भीर घाइते भएको डिएसपी लम्सालले जानकारी दिए।
उनीहरूलाई कोहलपुरमा रहेको नेपालगञ्ज मेडिकल कलेजमा उपचारका लागि लगिएको छ।
आगलागीमा परी देउकला विक, जना विक, छत्रा विक, मैते विक र मिना विक सामान्य घाइते भएका छन्।
उनीहरूको राकमस्थित स्थानीय मेडिकलमा उपचार भइरहेको प्रहरीले जनाएको छ।
प्रधानमन्त्री रोजगार कार्यक्रअन्तर्गत बनिरहेको सडकको काम गर्न गएका उनीहरू जंगलमा लागेको आगो निभाउन गएका थिए।
