झापामा मिटरब्याजीविरूद्ध १०२ जना पीडितहरूले निवेदन दर्ता गराएका छन्।
जिल्ला प्रशासन कार्यालय झापामा पीडितले लिखित उजुरी गरेको जिल्ला प्रशासन कार्यालय झापाले जनाएको छ।
सहायक प्रमुख जिल्ला अधिकारी रूद्रप्रसाद न्यौपानेका अनुसार नेपाल सरकारले वैशाख १७ गतेदेखि जेठ १४ गतेसम्म दुई पटक म्याद थपेर उजुरी दर्ता गराउन सूचना जारी गरेको थियो। सोही अवधिमा १०२ जनाको निवेदन परेको उनले बताए।
विभिन्न प्रयोजनका लागि पीडितले साहुबाट घरायसी कर्जा लिएका हुन्छन्। साहुले उनीहरूको अवस्था हेरेर ब्याज निर्धारण गर्ने र पीडितले स्वीकार गर्ने गरेको उनले बताए।
न्यौपानेले भने, ‘साहुले पीडितबाट मौका हेरेर घरायसी कर्जा दिने र जति पनि ब्याज तिर्छु भन्दै कपाली तमसुकमा सही छाप गराएका रहेछन्,’ यस्ता उजुरी उपर अब कारबाही हुने उनले बताए।
गैरकानुनी नगद कारोबार गर्नेले वार्षिक ३६ प्रतिशत ब्याज भुक्तान गर्ने सर्तमा कागज गरेको पीडितले निवेदनमा उल्लेख गरेका छन्।
कतिपयले जग्गा धितो पास समेत गरिदिएको न्यौपानेले बताए।
उनले भने, ‘यतिबेला उनीहरूको मिटर ब्याजीका कारण उठिबास भएको छ।’
मिटरब्याजी साहुले दिएको ऋणभन्दा बढीको कागज बनाएको, ऋण तिरेपछि पनि अझै धेरै ऋण बाँकी देखाएको, धितो दिएको जग्गा बिक्री गरेर तेस्रो पक्षलाई बेचेको, घर जग्गा साहुले आफ्नै नाममा पास गरेको, सापटी पैसा लगेर बैंकको खातामा पैसा नभएका चेक दिएको जस्ता निवेदन कार्यालयमा परेको न्यौपानेले सेतोपाटीलाई बताए।
सबैभन्दा धेरै शिवसताक्षी र दमक नगरपालिकाबाट पीडितको निवेदन परेको छ।
शिवसताक्षीमा मात्र २६ जना मिटरब्याजी पीडित छन्।
पीडक राजनीति दलका नेता समेत भएको पीडित महानन्द नेपाल दाबी गर्छन्। उनको करोडौ पर्ने ९ कठ्ठा जग्गा मिटरब्याजीले हात पारेका छन्।
पीडितले आफू १ करोड सम्मको कारोबारमा फसेको निवेदनमा उल्लेख गरेका छन्।
शिवसताक्षीका एक पीडितले भने,‘साहुबाट लिएको ऋण तिरेर कहिल्यै सकिएन। साहु महिनै पिच्छे ब्याज असुल्न घरमा आउँछन्। २ लाख लिएको कर्जाको ब्याज त्यति नै तिरिसकियो। अझै ऋण तिर्न बाँकी देखाउँछन्।’
जेठ १४ सम्म सरकारले मिटरब्याजी सम्बन्धी उजुरी गर्न आह्वान गरेको थियो।
जिल्ला प्रशासन कार्यालयमा परेका उजुरीमध्ये केही उजुरीमा सुनुवाइ भएको सहायक प्रजिअ न्यौपानेले बताए।
