मानव बेचबिखनको जोखिममा पर्न सक्ने भन्दै प्रहरीले एक महिनामा ९८८ जनालाई त्रिभुवन अन्तर्राष्ट्रिय विमानस्थलबाट घर फर्काएको छ।
नेपाल प्रहरीको मानव बेचबिखन अनुसन्धान ब्युरोले जेठमा मात्रै ९८८ जनालाई विमानस्थलबाट फर्काएको एसएसपी जीवनकुमार श्रेष्ठले जानकारी दिए।
भ्रमण भिसा वा नक्कली श्रम स्वीकृत बनाएर वैदेशिक रोजगारीमा जान लागेकाहरूलाई मानव बेचबिखनको जोखिममा पर्न सक्ने भन्दै प्रहरीले उनीहरूलाई फर्काएको हो।
एसएसपी श्रेष्ठका अनुसार उनीहरूलाई परामर्श दिएर फर्काइएको हो।
२०७९ वैशाखदेखि २०८० जेठ मसान्तसम्म प्रहरीले ३ हजार ७६४ जनालाई परामर्श दिएर फर्काएको छ। जसमध्ये ३४ जनालाई गौतमबुद्ध अन्तर्राष्ट्रिय विमानस्थलबाट समेत फर्काएको ब्युरोले जनाएको छ।
गत माघ यता भने प्रहरीले २ हजार ७६२ जनालाई फर्काएको हो।
माघमा २५० जना, फागुनमा ५५७ जना, चैतमा ६५३ जना, वैशाखमा ३१४ र जेठमा ९८८ जनालाई प्रहरीले फर्काएको हो।
भ्रमण भिसामा वैदेशिक रोजगारका लागि धेरैजसो मानिसहरू मानवबेचबिखनमा पर्ने गरेका छन्। कतिपय रोजगारीका लागि जाँदा अलपत्र पर्ने, श्रम शोषण, यौन हिंसामा समेत पर्ने गरेको छ।
ब्युरोले यस्ता जोखिमलाई मध्यनजरमा राखेर विमानस्थलबाटै जोखिममा पर्न सक्ने पहिचान गरी फर्काउन थालेको हो। ब्युरोले मानव बेचबिखनमा परेकाहरूको पनि उद्धार गर्दै आएको छ।
