गोली लागेर घाइते भएकी प्रहरी सहायक निरीक्षक (असई) लक्ष्मण चौधरीकी श्रीमती शर्मिला चौधरीको मृत्यु भएको छ।
उनको उपचारका क्रममा बिहीबार त्रिवि शिक्षण अस्पताल महाराजगञ्जमा निधन भएको काठमाडौं प्रहरी परिसरका प्रवक्ता एसपी कुमोध ढुंगेलले जानकारी दिए।
असई चौधरी नेपाल प्रहरीका एक पूर्व महानिरीक्षकको निजि सुरक्षा अधिकृत हुन्। असोज १० गते उनकी श्रीमती गोली लागेको अवस्थामा बालुवाटारस्थित निवासमै घाइते फेला परेकी थिइन्।
एसपी ढुंगेलका अनुसार त्यसदिन असई चौधरी घरमा थिएनन्।
उनले घरमै छोडेको पेस्तोल श्रीमतीले खेलाएको र मिसफायर हुँदा आफैंमाथि गोली लागेको प्रहरीको आकलन छ।
उनको शव पोस्टमर्टमका लागि त्रिवि शिक्षण अस्पतालमा राखिएको छ।
घटनाबारे महाराजगञ्ज प्रहरी वृत्तले अनुसन्धान गरिरहेको छ।
