प्रधानमन्त्री पुष्पकमल दाहाल प्रचण्ड ‘प्रचण्ड’ले इजरायलको बंकरमा रहेका नेपाली विद्यार्थीसँग कुराकानी गरेका छन्।
सोमबार दिउँसो प्रधानमन्त्री कार्यालयबाट प्रचण्डले इजरायलको बंकरमा रहेका विपिन सुवेदीसँग भिडिओ कुराकानी गरेका हुन्।
कुराकानीमा प्रधानमन्त्री प्रचण्डले उनीहरूलाई उद्धार गर्न सरकार तीन दिनदेखि लागिरहेको बताएका छन्।
उनले यही विषयमा छलफल गर्न मन्त्रिपरिषद् र सर्वदलीय बैठक बोलाइएको जानकारी गराए। उनले सरकारले गरेको प्रयासका बारेमा त्यहाँ रहेका विद्यार्थीहरूलाई पनि कम्युनिकेट गरिदिन सुवेदीलाई आग्रह गरे।
यस्तो छ प्रधानमन्त्री प्रचण्ड र विपिन सुवेदीको कुराकानीः
प्रधानमन्त्रीः तपाईंको रमेशजीसँग लगातार कुरा भइरहेको मैले थाहा पाएँ। अहिले परराष्ट्र मन्त्रीसँग पनि तपाईंको कुरा भइहाल्यो। हामी अस्ति रातिदेखि नै लगातार लागिरहेका छौं। स्थिति विस्तारै उसमा आइरहेको छ।
अहिले पनि यही विषयमा छलफल गर्न क्याबिनेटको बैठक बोलाइएको छ। सर्वदलीय बैठक पनि बोलाइएको छ। इजरायली राजदूतावासमा पनि लगातार कुरा भइरहेको छ। सायद परराष्ट्र मन्त्रीस्तरमा पनि कुरा होला । यी सबै कुरा तपाईंले त्यहाँ विद्यार्थीहरूलाई कम्युनिकेट गरिदिन पर्यो।एकथरी मान्छेले झुट प्रचार गरिरहेका छन्।
विपिन सुवेदीः सबैजनालाई भनिसकेँ। एम्बेसीले डेढ घन्टामा लिन आउँछौं । हजुरहरू एउटा ब्यागमा आफूलाई अहिले चाहिने एक जोर कपडा र पासपोर्ट ब्यागमा हालेर तयारी अवस्थामा बस्नुस्। लाइभ लोकेशन शेयर गर्नुस् भन्यो त्यो पनि गरेँ।
प्रधानमन्त्रीः ल बाँकी कुरा रमेशजीसँग गर्नुस्।
भिडिओ
