काठमाडौं महानगरपालिकाले आजबाट सडकका कुकुर–बिरालाको संख्या सीमित गर्न आज (मंगलबार) बाट बन्ध्याकरण गर्दै छ।
मेयर बालेन शाहले फेसबुकमार्फत् मंगलबारबाट ९ वटा वडामा बन्ध्याकरण र रेबिजविरूद्धको खोप एकैसाथ सञ्चालन गर्ने बताएका छन्।
‘चुनावको बेला घरदैलो गर्दा होस् वा कलसेन्टरमा गुनासो, काठमाडौंको मुख्य समस्यामध्ये कुकुर व्यवस्थापन पनि रहेछ। पशु कल्याण र पशु अधिकारका लागि हामी सचेत छौं। यसकारण सामुदायिक कुकुर र बिरालाको संख्या सीमित गरेर, भएकाहरूलाई बस्न र बाँच्न उचित वातावरण तयार पार्ने कार्यक्रम सञ्चालन गर्दैछौं,’ उनले भनेका छन्, ‘मंगलबारबाट महानगरपालिकाका ९ वटा वडा (४, ७, ९, ११, १४, १५, २५, ३१ र ३२) बाट एकैसाथ बन्ध्याकरण र खोपका कार्यक्रम चलाउनेछौं।’
मेयर शाहले आउँदो ३ महिनाभित्र ५ हजार ८ सयको बन्ध्याकरण र १६ हजारलाई रेविजविरुद्धको खोप दिने बताएका छन्।
९ वडा हुँदै हामी ३२ वडा पुग्ने पनि उनले बताएका छन्। वडा ४ मा पशुपंक्षीप्रति निर्दयता रोकावट समाज, नेपाल, वडा नम्बर ७ मा काठमाडौं एनिमल ट्रिटमेन्ट सेन्टर, वडा ९ मा बत्तीसपुतली युवा, समाज, वडा ११ मा अक्सा नेपाल, वडा १४ मा एनिमल नेपाल, वडा १५ मा नेपाल जुनोसिस एण्ड फुड हाइजिन रिसर्च सेन्टर, वडा २५ मा स्नेहाज केयरले काम गर्ने उनले बताएका छन्। वडा ३१ मा भेट फर योर पेट र वडा ३२ मा मण्डला भेट हस्पिटलले काम गर्ने पनि उनले बताएका छन्।
