अख्तियार दुरूपयोग अनुसन्धान आयोग इटहरीले कोशी प्रदेश प्रमुख पर्शुराम खापुङसमक्ष ३३औं वार्षिक प्रतिवेदन पेश गरेको छ।
बुधबार अख्तियार इटहरी कार्यालय प्रमुख सुरेश न्यौपानेले वार्षिक रूपमा सम्पादन गरेको काम कारबाही समेटेर तयार पारेको ३३औं वार्षिक प्रतिवेदन (आ.व ०७९/८०) प्रदेश प्रमुख खापुङसमक्ष पेश गरेका हुन्।
अख्तियारको प्रतिवेदन अनुसार यस आ.वमा २० हजार ९०५ उजुरी विभिन्न माध्यमबाट प्राप्त भएको थियो। अघिल्लो आ.व.बाट जिम्मेवारी सरेका ७१६२ उजुरी समेत गरी कुल उजुरी २८०६७ रहेको अख्तियारले जनाएको छ।
उक्त उजुरीहरूमध्ये १८ हजार ७९९ उजुरी फर्छ्यौट भई ६६.९८ प्रतिशत प्रगति हासिल गरेको अख्तियारले जनाएको छ।
आ.व. ०७९/८० मा दर्ता भएका उजुरीहरू मध्ये सबै भन्दा बढी संघीय मामिला (स्थानीय तह) अन्तर्गतका उजुरीहरू थिए।
अख्तियार दुरूपयोग अनुसन्धान आयोगको कार्यालय, इटहरीमा गत आ.व. ०७९/८० मा सबैभन्दा बढी उजुरी क्रमश: सप्तरीमा ६००, सुनसरीमा ५०२, मोरङमा ३८०, झापामा २१५, उदयपुरमा १५७ उजुरी रहेका थिए। सबैभन्दा कम तेह्रथुम जिल्लामा ४३ वटा उजुरी परेका थिए।
