दुर्गामूर्ति विसर्जन गर्ने क्रममा खोलामा डुबेर बेपत्ता भएका रूपन्देहीको कोटहीमाई-१ अमरगंजवाका २० वर्षीय सन्तकुमार राजभरको अवस्था अझै अज्ञात छ। बडादसैंको अवसरमा स्थापना गरिएका दुर्गामूर्ति विसर्जन गर्ने क्रममा अमरगंजवास्थित दानव र तिनाउ नदीको संगम दुईमुहानमा मंगलबार दिउसो १ बजेतिर तीनजना युवाहरू डुबेका थिए।
प्रहरीका अनुसार सन्तकुमार सँगै खोलामा डुबेका स्थानीय २४ वर्षीय अजय कुमार नाउ र १८ वर्षीय अजय राजभरको भने मंगलबार दिउसो शव फेला परेको थियो। मृतक अजय राजभर प्रहरी जवान रहेको र दसैंको छुट्टीमा घर आएको बखत उक्त घटना भएको कोटहीमाई-१ का वडा अध्यक्ष ब्रह्मदेव यादवले जानकारी दिए।
खोलामा डुबेर बेपत्ता भएका सन्तकुमारलाई मंगलबार रातिसम्म खोजी गर्दा पनि फेला नपरेपछि बुधवार बिहानैदेखि खोजी सुरू गरिएको प्रहरीले जनाएको छ। स्थानीयबासी, नेपाल प्रहरी, शसस्त्र प्रहरी लगायतको टोलीले दुईमुहान क्षेत्रमा खोलाभित्र पसेर उनको खोजी गरिरहेका छन्।
जिल्ला प्रहरी कार्यालय रूपन्देहीका प्रहरी प्रमुख प्रहरी उपरीक्षक भरतबहादुर विश्वकर्माले बेपत्ता रहेका सन्तकुमारको बुधवार विहानैदेखि खोजी सुरू गरिएको बताए। रूपन्देही, नवलपरासी र कपिलवस्तुका दक्षिणी क्षेत्रहरूमा बडादसैंको अवसरमा स्थापना गरिएका दुर्गामूर्ति विसर्जन गर्ने क्रममा विगतका वर्षमा पनि खोलामा डुबेर युवाहरूको मृत्युका घटना हुने गरेका थिए।
