संयुक्त राष्ट्रसंघका महासचिव एन्टोनियो गुटेरेसको सुरक्षामा खटिएका नेपाल प्रहरीका प्रहरी सहायक निरीक्षक (असई) टिकाराम ढुंगानाको मृत्यु भएको छ।
महासचिव एन्टोनियो गुटेरेस अन्नपूर्ण आधार शिविर पुग्ने भएकाले उनी सुरक्षाका लागि गत शनिबार त्यहाँ पुगेका थिए। फर्किनेक्रममा रहेका उनी मंगलबार अन्नपूर्ण गाउँपालिका-११ स्थित एक होटलमा बास बसेका थिए।
बास बस्नेक्रममा उनको लेक लागेर स्वासप्रस्वासमा समस्या आएको खबर पाएपछि बुधबार बिहान हेलिकप्टरबाट उनलाई पोखरा ल्याइएको जिल्ला प्रहरी कार्यालय कास्कीले जानकारी दिएको छ।
बिहान ९:३३ बजे उनलाई पोखराको मणिपाल अस्पताल पुर्याइएको थियो। उपचारको क्रममा ९:४६मा चिकित्सकले उनलाई मृत घोषणा गरेको कार्यालयले जनाएको छ।
उनी प्रहरी चौकी घान्द्रुकका इन्चार्ज थिए। पर्वत मोदी गाउँपालिका-६ का उनी ४२ वर्षका थिए।
