रूपन्देहीको बेलहियास्थित नेपाली भूमिमै आएर जथाभावी पार्किङ गरी राख्ने भारतीय नम्बरका सवारी साधनलाई हटाउन थालिएको छ।
दैनिक सयौं मालबाहक र सवारी साधन ओहोरदोहोर गर्ने सिमानाकामा जथाभावी पार्किङ गरी राख्ने सवारी साधनका कारण सडकको आवागमनमा नै अवरोध हुने गरेको भन्दै हटाउन सुरू गरिएको हो।
सिद्धार्थनगर नगरपालिका र अस्थायी ट्राफिक प्रहरी पोष्ट बेलहियाको सहयोगमा सिद्धार्थनगर वडा नं. १ कार्यालयले मंगलबारदेखि अव्यवस्थित रूपमा भइरहेको पार्किङ हटाउन सुरू गरेको हो।
सिद्धार्थनगर वडा नंं १ का वडाअध्यक्ष उज्ज्वल पोखरेलले सीमा नाकाबाट आउने पर्यटकहरूलाई खुला र व्यवस्थित सडकमा स्वागत गर्नुको सट्टा पार्किङमा राखिएका सवारी साधनले सडकमा नै अवरोध भएपछि हटाउन सुरू गरिएको जानकारी दिए।
‘सडकमै पार्किङ गरिएका सवारी साधनले आवागमनमा नै अवरोध हुँदा सीमा नाकामा अनावश्यक भीड हुने गरेको थियो, गाडी र मानिसको भीडका कारण दुर्घटना र अन्य सुरक्षाको समेत जोखिम हुने भएपछि सडकमा जथाभावी गरिने पार्किङलाई हटाउन थालिएको हो,’ वडा अध्यक्ष पोखरेलले भने।
सीमा नाकामा नेपालकै भूमिमा आएर भारतीय नम्बरको सवारी साधन पार्किङ गर्ने र यात्रुहरूलाई तानातान गर्ने गुनासो आउने गरेको थियो।
अस्थायी ट्राफिक प्रहरी पोष्ट बेलहियाका प्रमुख प्रहरी सहायक निरीक्षक युवराज सेनले सडकमै अव्यवस्थित रूपमा सवारी साधन पार्किङ गर्ने र यात्रुहरूलाई चढाउने गर्दा ट्राफिक व्यवस्थापनमा समस्या भएपछि त्यस्तो पार्किङलाई हटाउन थालिएको बताए।
सेनले वडा कार्यालय र स्थानीयबासीबाट समेत भारतीय नम्बरका सवारी साधनको अव्यवस्थित पार्किङका कारण दुर्घटनाको सम्भावना बढेको भन्दै विगतदेखि पटकपटक गुनासो आएपछि अहिले हटाउन सुरू गरिएको बताए। यसअघि पनि सडकमा अव्यवस्थित पार्किङ नगर्न आग्रह गर्दै आए पनि अटेर गरेपछि वडा कार्यालय र प्रहरी मिलेर हटाउन सुरू गरेको हो।
भारतीय नम्बरका गाडीहरूले नेपालबाट भारततर्फ जाने यात्रुहरूलाई सीमा नाकावारि नै आएर चढाउने गर्दै आएका थिए भने भारतबाट नेपालतर्फ आउँदा सुनौली पारि नै झार्दै आएका छन्। बेलहियाका स्थानीय प्रशान्त थापा क्षेत्रीले नेपालमै आएर भारतीय नम्बरका गाडीहरू पार्किङ गर्दा नेपाली सवारी साधन समेत मर्कामा पर्ने गरेको बताए।
