काठमाडौंको कीर्तिपुर क्षेत्रमा खानेपानी व्यवस्थापनका लागि त्रिभुवन विश्वविद्यालयको २४ रोपनी जग्गा प्रयोग गर्ने सहमति भएको छ।
त्रिवि, काठमाडौं उपत्यका खानेपानी व्यवस्थापन बोर्ड, आयोजना कार्यान्वयन निर्देशनालय तथा काठमाडौं उपत्यका खानेपानी लिमिटेड (केयुकेल) बीच जग्गा प्रयोगलगायत विभिन्न विषयमा सात बुँदे सहमति भएको हो।
एसियाली विकास बैंकको ऋण सहयोगमा कीर्तिपुर क्षेत्रको थोक वितरण प्रणालीका लागि रिजरभ्वायर, पम्प हाउस, गार्ड क्वार्टरलगायत भौतिक संरचना बनाउन २४ रोपनी रोपनी जग्गा काठमाडौं उपत्यका खानेपानी व्यवस्थापन बोर्डलाई उपभोग गर्न दिने सहमति भएको हो।
त्रिविले उक्त जग्गा २५ वर्षका लागि उपलब्ध गराउने सहमति पत्रमा उल्लेख छ।
गत कात्तिक १४ गते भएको सहमतिमा त्रिवि रजिष्ट्रार पेशल दाहाल, काठमाडौं उपत्यका खानेपानी व्यवस्थापन बोर्डका कार्यकारी निर्देशक संजिवविक्रम राणा, काठमाडौं उपत्यका खानेपानी लिमिटेडका प्रमुख कार्यकारी अधिकृत ज्ञानेन्द्रबहादुर कार्की, आयोजना कार्यान्वयन निर्देशनालयको तर्फबाट आयोजना निर्देशक राजेन्द्र सापकोटाले हस्ताक्षर गरेका छन्।
सहमतिअनुसार जग्गा उपलब्ध गराएवापत त्रिविले दैनिक तीन लाख लिटर पानी नि:शुल्क पाउनेछ।
त्रिवि स्ववियुले आफूहरूले निरन्तर गरेको खबरदारीबाट यो सहमति बनेको र सहमतिले त्रिविलाई फाइदा पुग्ने बताएको छ।
स्ववियु सभापति श्यामराज ओझाले विश्वविद्यालयले खानेपानीलाई तिर्नुपर्ने ३ करोड रुपैयाँ पनि नयाँ सम्झौताले मिनाहा भएको बताए। ‘स्ववियुले गरेको खबरदारी र पहलले त्रिविलाई फाइदा पुगेको छ,’ उनले भने।
यस्तो छ सहमति पत्र:
