शुक्रबार मध्यराति गएको ६.४ म्याग्निच्युडको भूकम्पमा परी शनिबार बिहानसम्म जाजरकोट र रूकुम पश्चिममा १२८ जनाको मृत्यु भएको छ। तर, भूकम्पको केन्द्रबिन्दु बारेकोट गाउँपालिकामा भने मानवीय क्षति नभएको अध्यक्ष वीरबहादुर गिरीले जानकारी दिएका छन्।
‘भूकम्पको कम्पन यत्रो थियो कि कोही पनि बँच्दैन भन्ने लाग्यो,’ विपत्तिबारे सुनाउँदै भूकम्पको केन्द्रविन्दु रहेको अध्यक्ष गिरीले सेतोपाटीसँग भने।
भूकम्पपछि बारेकोटमा विद्युत अवरूद्ध भयो। सञ्चार पनि विच्छेदित भयो।
‘सबै मानिसहरू घरबाहिर निस्किएका छन्। कोलाहलको अवस्था छ। कहाँ कति क्षति भयो भन्ने अनुमानै गर्न सक्ने अवस्था रहेन। राष्ट्रिय भूकम्प मापन तथ अनुसन्धान केन्द्रले हाम्रै पालिकाभित्रको रामीडाँडा केन्द्रविन्दु भनेपछि म त्यहाँ पनि पुगेँ,’ अध्यक्ष गिरीले भने, ‘ठाउँठाउँमा सुख्खा पहिरो खसेको, घरहरू क्षतिग्रस्त बनेको पाएँ।’
गाउँपालिका अध्यक्ष गिरीले बारेकोटमा मानवीय क्षति नभएको बताए। स्कुल, स्वास्थ्य चौकीलगायत संरचना भने सग्ला देख्न मुस्किल रहेको उनको भनाइ छ।
‘गाउँपालिकाको टोली, सुरक्षाकर्मीहरू गाउँगाउँ पुगेर विवरण संकलन गरिरहेका छौं। अहिलेसम्म मानवीय हताहतीको विवरण प्राप्त भएको छैन,’ उनले भने घाइतेहरूको बारेकोटकै स्वास्थ्य केन्द्रमा उपचार भइरहेको छ। घाइतेहरूको पनि अवस्था सामान्य भएकाले अन्यत्र रिफर गर्नुपर्ने अवस्था पनि देखिएको छैन।’
अध्यक्ष गिरीले बारेकोटमा तत्काल त्रिपाल, खाद्यान्न लगायतका सामग्रीको खाँचो रहेको बताए। अधिकांश घर भत्किएको र चिसो मौसम भएकाले महिला, बालबालिकाको स्वास्थ्यस्थितिलाई ध्यानमा राखेर अस्थायी बसोबासको प्रबन्ध मिलाउनुपर्ने अवस्था रहेको उनले औंल्याए।
‘हामीलाई तत्काल राहतको खाँचो छ। परकम्पहरू गइरहेका मानिसहरूमा त्रास देखिन्छ। फेरि ठूलो झट्का बेहोर्नुपर्ने हो कि भन्ने छँदै छ। राहतका लागि हामीले केन्द्र, र प्रदेश सरकारसँग पनि समन्वय गरिरहेका छौं,’ उनले भने।
