जाजरकोट र रूकुम पश्चिममा भूकम्पमा परी घाइते भएकाहरूको उपचारका लागि नेपालगञ्जस्थित भेरी अस्पताललाई डेडिकेटेड अस्पताल तोकिएको छ।
शनिबार बिहानदेखि सो अस्पतालमा २७ जना घाइतेहरूलाई उपचारका लागि लगिएको छ। अस्पतालका अध्यक्ष वीरेन्द्र बहादुर शाहका अनुसार अस्पताल ल्याउँदाल्याउँदै एक जनाको मृत्यु भएको छ।
‘अहिले २६ जनाको भर्ना गरी उपचार भइरहेको छ,’ अध्यक्ष शाहले भने, ‘घाइतेहरूको उपचारका लागि हामी स्ट्याण्डबाई बसेका छौं।’
उपचार भएकामध्ये अधिकांशको टाउकोमा चोट रहेको पनि उनले बताए।
‘हातखुट्टा लगायत शरीरका अन्य स्थानमा पनि चोट छ, सबैको उपचार भइरहेको छ,’ उनले भने।
भूकम्पमा परेका घाइतेहरूको उपचारका लागि डेडिकेटेड अस्पताल तोकेपछि आज शनिबार भए पनि अधिकांश स्वास्थ्यकर्मीहरू उपस्थित रहेको अध्यक्ष शाहले बताए।
भेरी अस्पतालको नयाँ भवन निर्माण सम्पन्न नभइसकेकाले अहिले १६० शय्या छ। ७० जना डाक्टरसहित ३ सय जना जनशक्ति रहेकामा शनिबार अधिकांश डाक्टरहरू उपस्थित रहेको उनले बताए।
उनका अनुसार शनिबार ओपिडी बन्द हुने हुँदा अहिले अस्पतालमा बिरामीको चाप नभएकाले भूकम्पमा परी घाइतेहरूको उपचारमा सहज छ।
भूकम्पका घाइतेहरूको उपचारलाई उच्च प्राथमिकता दिएका कारण इमर्जेन्सीमा आएका बिरामीहरूको उपचारमा केही असहज भएको उनले बताए।
भोलि अझै चुनौतिपूर्ण रहने आकलन गर्दै कसरी व्यवस्थापन गर्न सकिन्छ भन्नेबारे छलफल भइरहेको शाहले बताए।
‘भोलि ओपिडीमा अन्य बिरामीहरू पनि आउनुहुन्छ। उहाँहरूको उपचारसँगै भूकम्पका घाइतेहरूको उपचारका लागि चुनौती हुनसक्छ,’ उनले भने, ‘त्यसलाई कसरी मिलाउने भन्नेबारे प्रमुख जिल्ला अधिकारी लगायतका सरोकारवाला निकायसँग कुरा भइरहेको छ।’
भेरी अस्पतालमा बिरामीको उपचारार्थ रगत अभाव हुन नदिन रेडक्रसले अस्पताल परिसरमै रक्तदान कार्यक्रम गरेको छ।
अस्पतालमा औषधी र जनशक्तिको अभाव तत्काल नरहेको शाहले बताएका छन्।
भोलि अन्य बिरामीहरूको उपचार कसरी गर्न असहज होला कि भन्ने मात्रै हो, अरू समस्या छैन,’ उनले भने।
बाँके प्रशासनले कोहलपुर मेडिकल कलेज लगायतका निजी अस्पताललाई पनि तयारी अवस्थामा रहन भनेको छ।
सुर्खेतस्थित कर्णाली प्रादेशिक अस्पतालमा पनि घाइतेहरूको उपचार भइरहेको छ।
भूकम्पमा परी सय जना भन्दा बढी घाइते भएका छन्। केही घाइतेहरूको स्थानीय अस्पताल र स्वास्थ्य चौकीमा उपचार भइरहेको कर्णाली प्रदेश प्रहरी कार्यालयका प्रवक्ता एसएसपी गोपालचन्द्र भट्टराईले जानकारी दिए।
