मास्टरसेफ सन्तोष साहले जनकपुरमा मिस्टिक मिथिला होटेल सञ्चालनमा ल्याएका छन्।
मिथिला थालीको सफलतापछि जन्मदिनको अवसरमा आइतबारबाट उनले भानुचोकस्थित मिस्टिक मिथिला होटेलको शुभारम्भ गरेका हुन्।
भारतका विभिन्न प्रान्तका परिकार पस्किँदै पर्यटन प्रबर्द्धन र जनकपुरको विकासमा टेवा पुर्याउने उद्देश्यले होटेल सञ्चाचालनमा ल्याएको मास्टरसेफ साहले बताए।
‘लाइभ म्युजिकसहितको काठमाडौंजस्तै यो नयाँँ एडिसन बनाएका हौँ। विदेशमा ख्याती कमाएका इन्डियन फुड स्पेशलाइज्ड सेफहरु हामीले राखेका छौँ,’ उनले भने, ‘हामीले जनकपुरमा खाने र बस्ने ठाउँ बनाइसक्यौँ अब सरसफाइमा काम गर्ने योजना छ।’
मिस्टी मिथिलामा जनकपुरमै पहिलो पटक ब्याम्बो बिरयानी र पर्दा बिरियानीसमेत पस्किन थालिएको छ।
जनकपुरका व्यापारी नवल मुरारका र सेफ सन्तोषको संयुक्त रुपमा उक्त होटेलमा ७ करोड रुपैँयाको लगानी रहेको बताइएको छ। मिस्टी मिथिलामा ३ स्वीटरुम र ८ वटा डिलक्स रुम सहित १७ वट कोठा छ।
स्वीट रुमको एक दिनको अधिकतम ३५ सय रुपैयाँ तोकिएको छ। यसअघि गत असारमा उनले रामानन्द चोकस्थित मिथिला थाली संचालनमा ल्याएका थिए।
‘जनकपुको संस्कृति र मौलिकतालाई प्रवद्र्धन गर्न मसँग दुईवटा विकल्प थियो। कि सिकाउँदै जाने कि आफै गर्ने अनि अरुले हेरेर सिक्ने। मैले दोस्रो विकल्प रोजे,’ उनले भने, ‘मिथिला थालीमा मैले नसोचेजतिको सफलता पाएँ। प्रत्येक दिन कम्तीमा पाँच सय जनाले त्यहाँ खाना खान्छन्। प्रत्यक्ष र अप्रत्यक्ष रुपमा दर्जनौंले रोजगार पाएका छन्।’
