नेपाल प्रहरीको केन्द्रीय अनुसन्धान ब्यूरो (सिआइबी) ले देउराली बचत तथा ऋण सहकारी संस्था लिमिटेडबाट ठगिएको भए जाहेरी दिन आग्रह गरेको छ।
सोमबार सूचना जारी गर्दै सिआइबीले सहकारीका काठमाडौं, ललितपुर र भक्तपुरका विभिन्न शाखामा रकम जम्मा गरी ठगिएको भए प्रमाणसहित जाहेरी दिन आग्रह गरेको हो।
निक्षेपकर्ता सदस्यहरूले संस्थामा बचत तथा मुद्दती खाता खोलेर जम्मा गरेको रकमको साँवा र ब्याज बचत तथा मुद्दती खाताको अवधि पुगिसकेपछि पनि रकम फिर्ता नपाएको भनेर सिआइबीमा जाहेरी परेको थियो।
त्यस मुद्दामा अनुसन्धान जारी नै रहेको हुँदा प्रहरीले सूचना जारी गरेको हो। यसबारे थप सहयोग र जानकारीको लागि ०१४५११७७६ नम्बरमा सम्पर्क गर्न अनुरोध गरेको छ।
सिआइबीले सहकारीका अध्यक्ष काभ्रेका रवीन्द्र अधिकारीलाई पक्राउ गरी अनुसन्धान गरिरहेको छ। उनीसहित ३ जनालाई प्रहरीले पक्राउ गरेको छ।
अधिकारीलाई असोज १६ गते, कर्जा समितिका संयोजक राजेन्द्र खत्री र व्यवस्थापक दिपक केसीलाई कात्तिक १२ गते पक्राउ गरेको थियो।
उनीहरूले निक्षेपकर्ताको करोडौं रकम हिनामिना गरेको आरोप छ।
--1715160207.JPG)
