नेकपा (क्रान्तिकारी कम्युनिष्ट पार्टी)का प्रवक्ता धर्मेन्द्र बाँस्तोला ७० हजार धरौटीमा छुटेका छन्।
दाङ जिल्ला अदालतले शुक्रबार उनलाई धरौटीमा छोड्न आदेश दिएपछि उनी छुटेका हुन्।
दाङका प्रहरी प्रमुख एसपी रामबहादुर केसीका अनुसार शुक्रबार नै अदालतले तोकेको धरौटी रकम बुझाएर नेता बाँस्तोला छुटेका हुन्।
पूर्वपश्चिम राजमार्गअन्तर्गत कात्तिक २ गते राति पौने १० बजेतिर दाङको राप्ती गाउँपालिका–५ सिंङ्गे नजिकै बा ९ च ७१९८ नम्बरको नेता बाँस्तोलाले चलाएको स्कार्पियोले विपरीत दिशातर्फ गइरहेको रा ६ प ५७३८ नम्बरको मोटरसाइकललाई ठक्कर दिएको थियो।
आफ्नो घर सुर्खेतको पञ्चपुरी नगरपालिका–९ तर्फ जाँदै गरेका बाँस्तोलाले चलाएको स्कार्पियोले मोटरसाइकललाई ठक्कर दिँदा दाङको राप्ती गाउँपालिका–५ का २९ वर्षीय बसन्तराम चौधरीको मृत्यु भएको थियो।
टाउकोमा चोट लागेको चौधरीलाई प्रहरीले उद्धार गरी स्वास्थ्य चौकी सिसहनियाँ पुर्याएको केहीबेरमै राति १० बजेपछि चिकित्सकले मृत घोषणा गरेका थिए। दुर्घटनामा बाँस्तोलालाई भने कुनै चोटपटक लागेको थिएन।
यो पनि: नेता धर्मेन्द्र बाँस्तोला ८ दिनदेखि प्रहरी हिरासतमा
