कस्मेटिक सर्जरी भनेको सौन्दर्यको लागि आफूलाई चित्त नबुझेको भाग मिलाउनु हो। कस्मेटिक सर्जरीअन्तर्गत आँखाको मुन्द्री बनाउने, नाकको सर्जरी, राइनो प्लास्टिक सर्जरी, स्तनको सर्जरी, शरीरको अनावश्यक बोसो घटाउने लगायत पर्छ। जन्मजात कान ठूलो अथवा अगाडि फर्केको हुन्छ। त्यस्तै उमेर अनुसार अनुहारको छाला झोल्लिँदै गयो भने त्यसलाई मिलाउनु पनि पर्छ।
स्तनको आकार धेरै ठूलो भएर कपडा लगाउनै नमिल्ने समेत हुन्छ। बच्चा जन्मिएपछि स्तनपानले गर्दा झोल्लिएको स्तन मिलाउन समेत सकिन्छ। स्तनको कस्मेटिक सर्जरी गरेपछि स्तनपान गर्न मिल्दैन कि भन्ने गरिन्छ तर त्यस्तो केही हुँदैन।
धेरै मोटाएर पेटको छाला लत्रिएको हुन्छ। लुगा लगाउँदा नमिल्ने समेत हुन्छ। त्यस्तो अवस्थामा अपरेसन गरेर छाला काट्ने र बोसो निकाल्ने समेत गरिन्छ। यसको कुनै साइड इफेक्ट छैन।कुनै पनि कस्मेटिक सर्जरीको सामान्य खालको असर मात्रै हुन्छ। तर यसलाई व्यवस्थापन गर्न सकिन्छ। मान्छेले हेर्दा पेटको बोसो निकाल्दा यसको नकारात्मक असर पर्छ जस्तो लाग्न सक्छ।त्यस्तो हुँदैन किनकि हामीले पेटको बोसोमात्र निकाल्ने हो। हामी आन्द्राभुडीसम्म जाँदैनौं।
अनुहारको सर्जरी भनेको अर्कै बनाउने भन्ने होइन।
अनुहारको पनि विभिन्न अंगमध्ये समस्या भएको अंगको मात्र सर्जरी गरिन्छ। तर उमेर अनुसारको गालालाई टाइट गरेर मिलाउन भने सकिन्छ।
अनुहार नै परिवर्तन गर्ने भनेर समेत आइरहेका हुन्छन्। तर त्यो सिनेमामा देखाइने मात्र हो। यथार्थमा यो सम्भव छैन।
अहिले कस्मेटिक सर्जरी गर्नेहरूको संख्या बढेको छ। एउटा कारण यसबारे जनचेतना भएर हो भने अर्को कारण विदेशमा बस्नेहरू हो। विदेशमा कस्मेटिक सर्जरीको बीमा गरिँदैन। त्यहाँ महंगो समेत हुने भएकाले कस्मेटिक सर्जरीको लागि नेपाल आउँछन्। बेलायत, अमेरिका, क्यानडा लगायतका देशमा बस्ने नेपालीहरू उपचारका लागि नेपाल आउँछन्। विदेशमा बस्नेहरू मात्रै होइन भुटानबाट समेत यसको लागि नेपाल आउँछन्।
कस्मेटिक सर्जरीको परिणाम देखिन कम्तीमा ३ महिनादेखि ५ महिना लाग्छ। सुरूमा अपेसन गरेको भाग सुन्निएको जानका लागि ४ देखि ६ हप्तासम्म लाग्छ। त्यसैले पूर्ण परिणाम देखिन ६/७ महिना समेत लाग्न सक्छ। त्यसैले यो समय कुर्नैपर्छ।
(वरिष्ठ कस्मेटिक प्लास्टिक सर्जन डा.जसवन शाक्य आरूस लाइफस्टाइल अस्पताल कुपन्डोल र स्वास्थी लेजर एण्ड स्किन केयर नक्सालमा कार्यरत छन्।)
