नेपाल प्रहरीका प्रहरी उपरीक्षक (एसपी)ले चलाएको गाडीसँग मोटरसाइकल ठोक्किँदा मोटरसाइलमा सवार एक किशोरको मृत्यु भएको छ।
शुक्रबार बेलुका करिब ९ बजे झापाको कन्काई गाउँपालिका-८ बिरिङ खोलाको पुलमा पश्चिमबाट पूर्वतर्फ आउँदै गरेको मे १० प १६६९ नम्बरको मोटरसाइकल प्रहरीको एसपीले चलाएको मे१च ७८३९ नम्बरको स्कारपिओ गाडीसँग ठोक्किएको थियो।
गाडी प्रदेश प्रहरी कार्यालय धरानमा कार्यरत एसपी भीमबहादुर दाहालले चलाएका थिए।
दुर्घटनामा परी झापाको कमल गाउँपालिका वडा नं ६ का १८ वर्षीय अनील मर्डीको मृत्यु भएको जिल्ला प्रहरी कार्यालय झापाका सूचना अधिकारी डिएसपी खगेन्द्रप्रसाद रिजालले जानकारी दिए।
डिएसपी रिजालका अनुसार मोटरसाइकलमा तीन जना सवार थिए। दुर्घटना हुँदा मोटरसाइकल चालक कमल गाउँपालिका–६ का १९ वर्षीय खगेन्द्र ताजपुरीया र सोही ठाउँका १८ वर्षीय पुजन राजवंशी घाइते भएका छन्।
उनीहरूको विर्तामोडस्थित बि एन्ड सी मेडिकल कलेजमा उपचार भइरहेको छ।
उनीहरूले मापसे गरेको र सवारी चालक अनुमतिपत्र समेत नरहेको डिएसपी रिजालले जानकारी दिए। तीव्र गतिका कारण मोटरसाइकल अनियन्त्रित भई गाडीसँग ठोक्किएको उनले बताए।
गाडी र गाडीका चालक एसपी दाहाललाई नियन्त्रणमा लिएर इलाका प्रहरी कार्यालय विर्तामोडमा राखिएको दुर्घटनाबारे अनुसन्धान भइरहेको डिएसी रिजालले जानकारी दिए।
