काठमाडौं चाबहिलका २३ वर्षिय मनिष उप्रेती स्नातक तहको पढाइ सकेर घर बसिरहेका छन्।
अब पुस २ गते हुने त्रिभुवन विश्वविद्यालयको दीक्षान्त समारोह सकेर उनी थप अध्ययनका लागि अमेरिका जाने तयारीमा छन्।
करिब पाँच वर्षदेखि उनी चार पांग्रे गाडी चलाउँछन्।
सोमबार साँझ करिब ६ बजेतिर आफ्ना काका सुरेन्द्रसँग उनी काठमाडौंको पेप्सीकोला गएका थिए।
पेप्सीकोलास्थित मटन स्टेशन नजिकै पुगेर काका सुरेन्द्रले डेरीमा सामान किन्न भनेर रोकिए। काका निस्किएपछि मनिषले विपरीत लेनमा गएर गाडीभित्रै बसेर आफ्ना काकालाई कुरिरहेका थिए।
‘करिब साढे ६ बजेतिर हामी पेप्सीकोला मटनस्टेशन अगाडिको भित्रीबाटोमा थिएँ। मैले बाटो छेउमा गाडी रोकेर काकालाई कुरेर बसेको थिएँ,’ उनले भने, ‘बाटोका दुबै छेउमा गाडी रोक्न हुन्न भन्ने मैले बुझेको छु। त्यसैले म गइरहेको लेनबाट अर्को लेनमा गएर रोकिएको थिएँ।’
उनले गाडी गलत लेनमा लगेर कुरिरहेको पनि स्वीकारेका छन्।
त्यसबीच उनले केहीबेर आफ्नो मोबाइल फोन चलाएर बसेका थिए। मोबाइल फोन चलाइरहँदा उनले सडकमा के भइरहेको छ भन्ने ख्याल गरेनन्।
मनिषले गाडी रोकेको ठाउँ भन्दा अगाडि प्रहरीको भ्यान ‘पास’ हुन सकेको रहेनछ।
केहीबेरपछि एक जना पुरूष आएर उनको गाडीको सिसामा ढकढक्याए।
मनिषले सेतोपाटीलाई भनेअनुसार गाडीको सिसा तल झार्ने बित्तिकै ती पुरूषले झर्केर भने, ‘तेरो गाडी रोक्ने ठाउँ यही हो?’
मनिषले पनि ठूलो स्वरमा ‘के भयो त दाइ’ भनेर भनेका रहेछन्।
‘अन्जान मान्छे आएर एक्कासी मसँग ठूलो स्वरमा कराएपछि मैले पनि ठूलो स्वरमा बोलेँ। यहाँ मेरो कमजोरी भयो,’ मनिषले भने, ‘को हो भन्ने मलाई थाहा पनि थिएन। के भयो त के समस्या भयो भनेर भनेको मात्रै थिएँ।’
त्यति भएपछि ती पुरूषले आफूलाई तानेको उनले बताए।
‘बढ्ता बोल्छस्। को हो तैले मलाई चिनेको छस् भन्दै मलाई भित्रैबाट ढोका खोलेर घिसारेर निकाले,’ उनले भने।
मनिषले भनेअनुसार बाहिर निस्केपछि ती पुरूषले अगाडि रहेका केही प्रहरीहरूलाई निर्देशन दिंदै भनेका थिए, ‘यसलाई भ्यानमा हाल। यसलाई लगेर थुन्ने हो। दायाँबायाँ बोल्यो भने यसलाई अभद्र व्यवहारको मुद्दा हाल्ने हो।’
त्यसपछि मात्रै आफूले ती व्यक्ति प्रहरी भएको थाहा पाएको मनिष बताउँछन्। ती पुरूष जिल्ला प्रहरी परिसर भक्तपुरमा कार्यरत डिएसपी बसन्त पाठक भएको मनिषले बताए।
मनिषलाई त्यहाँबाट गाडीमा हालेर प्रहरी परिसर भक्तपुरको हिरासतमा पुर्याए। काका सुरेन्द्र डेरीबाट सामान किनेर फर्किँदा प्रहरीले मनिषलाई लगिसकेको थियो।
आसपास पसलका मानिसहरूले प्रहरीले समाएर लगेको भन्ने थाहा पाएपछि मात्रै सुरेन्द्रले आफ्ना भतिजलाई प्रहरीले समाएको थाहा पाए।
‘२ मिनेटभित्रै मलाई लगे। सिभिल ड्रेसमा आएको मान्छे, एक्कासी आएर मसँग त्यस्तो व्यवहार गर्नुभयो। कहिल्यै झगडामा नपरेको मान्छेलाई प्रहरीमाथि हातपात गर्यो भनियो,’ उनले भने, ‘चौकी लगेर मलाई हतकडी लगाइयो, मेडिकल गराइयो, रातभरी हिरासतमा सुत्न सकिनँ। जिन्दगीमै नसोचेको कुरा हुँदा कस्तो महसुस होला मलाई।’
पेप्सीकोला काठमाडौंभित्र पर्छ। भक्तपुर प्रहरीको क्षेत्राधिकारभित्र नपर्ने ठाउँबाट कुनै गल्तीबिना आफूलाई लगेर रातभरि हिरासतमा राख्दा अन्याय महसुस भएको उनी बताउँछन्। आफूले गलत दिशामा पार्किङ गरेको भए चिट काटेर जरिवाना तिराउन सक्नेमा त्यसो नगरेकोमा उनको गुनासो छ।
‘मैले गाडी चलाएको ५ वर्ष भयो। गाडीले अलि अप्ठ्यारो भयो, हटाइदेउ न भनेको मात्रै भए पनि हटाउँथे होला। तर उहाँ सिधै आएर सिधै आएर थर्काएर लग्नुभयो,’ उनले भने, ‘काका उहाँको घर अगाडि पनि पुग्नुभयो। तर फोन उठानुभएन। पछि फोन अफ गरेर बस्नुभयो।’
भक्तपुरकै केही प्रहरीहरूले उनलाई त्यहाँ राख्न नमिल्ने भन्दै कुरा गरिरहेको पनि उनले सुनेका थिए। तर डिएसपीकै आदेश छ भन्दै ‘सोधपुछको लागि’ भन्दै राखियो।
उनलाई मंगलबार बिहान ७ बजेतिर छाडिएको थियो।
यसरी आफूमाथि प्रहरी अधिकृतले दुर्व्यवहार गरेकाले राष्ट्रिय मानव अधिकार आयोगमा निवेदन दिने तयारी गरिरहेको पनि उनले बताए।
डिएसपी पाठकले भने आफूमाथि अभद्र व्यवहार गरेकाले पक्रेर लगेको बताए। उनले कसैलाई पनि बिना कारण नथुनेको बताए।
‘बाटोमा गाडी उल्टो फर्काएर उनी मोबाइल चलाएर बसिरहेका थिए। यहाँ गाडी नराख्नु बाटो जाम भयो भनेको थिएँ,’ डिएसपी पाठकले भने, ‘तपाईंलाई के मतलब, गाडी जहाँ सुकै राखेपनि भनेर मुख छाड्यो। अटेर गरेपछि ल्याएर थुनेको हुँ।’
आफूले उनीमाथि हातपात नगरेको बरू पक्रेर लगेको बताए। उनले मनिष अभद्र व्यवहारको मुद्दा चलाउनुपर्ने नै व्यक्ति भएको बताए।
‘मुद्दा चलाउनुपर्ने मान्छे थियो। चिनेकै मान्छेको आफन्त रहेछ। यसरी गर्न हुँदैन भनेर पनि उनले सिक्नुपर्ने थियो,’ उनले भने, ‘जो चोर उसको ठूलो स्वर भएको हो। वास्तै नगरेका हुन्। प्रहरीकै गाडी जाममा परेको छ।’
मुखमुखै लागेकै भरमा थुन्न पाइन्छ त भन्ने प्रश्नमा उनले अभद्र व्यवहार गर्न नपाइने बताए।
‘अभद्र व्यवहार त गर्न पाइएन नि। उनी आफै गल्ती गरेका छन्। यसो नगर्नुस्, गाडी यहाँ नराख्नुस् भन्दा त्यस्तो व्यवहार गरेपछि अभद्र व्यवहार भयो नि,’ उनले भने, ‘अरू कुरामा भएको भए पनि हो। त्यहाँ गाडी राख्न पाइन्छ भनेको भए आधार देखाउन पर्यो। तपाईंलाई के मतलब भन्ने होइन नि। त्यस्तो भन्न मिल्छ त?’
