काठमाडौं विश्वविद्यालयबाट अहिलेसम्म १२ प्रतिशत भन्दा बढी विदेशी विद्यार्थी दीक्षित भएका छन्।
बुधबार विश्वविद्यालयले गरेको दीक्षान्त समारोहमा विश्वविद्यालयका कुलपतिसमेत रहेका प्रधानमन्त्री पुष्पकमल दाहाल प्रचण्डले अहिलेसम्म दीक्षान्त हुने विद्यार्थीहरूमध्ये १२ प्रतिशत विदेशी विद्यार्थी भएको बताएका हुन्।
यस वर्ष पनि काठमाडौं विश्वविद्यालयबाट ६.१५ प्रतिशत विद्यार्थी दीक्षित भएको उनले बताएका छन्।
‘आज दीक्षित हुने विद्यार्थीहरूमध्ये ६.१५ प्रतिशत विदेशी विद्यार्थी भएको र विश्वविद्यालयबाट हालसम्म दीक्षित भएकामध्ये १२ प्रतिशतभन्दा बढी विदेशी भएको मैले बुझेको छु,’ प्रधानमन्त्री प्रचण्डले भने।
प्रधानमन्त्री प्रचण्डले यो नै नेपालको शैक्षिक अन्तर्राष्ट्रियकरणको ज्वलन्त उदाहरण रहेको बताएका हुन्। यो क्रमलाई राष्ट्रिय अभियानका रूपमा थप सुदृढ र विस्तारित बनाउनु आवश्यक रहेको पनि उनले बताए।
प्रधानमन्त्री प्रचण्डले नेपालको मौलिक ज्ञान, प्रविधि र सीपलाई विश्व परिवेश र ज्ञानको बजारसँग जोडेर नेपालको शिक्षाको अन्तर्राष्ट्रियकरण गर्ने र नेपाललाई अन्तर्राष्ट्रिय शिक्षाको बनाउनुपर्नेमा जोड दिए। दीक्षित भएका विद्यार्थीहरूलाई नेपालमै बस्न पनि उनले आग्रह गरे।
‘आज दीक्षित हुने विद्यार्थीलाई म विशेष अनुरोध गर्न चाहन्छु — तपाईंहरू यहाँ आर्जन गरेको ज्ञान र सीपलाई देशको र मानव जातिको हितका लागि अर्पण गर्ने प्रयत्न गर्नुहोस्,’ प्रधानमन्त्री प्रचण्डले भने, ‘थप अध्ययन र अनुभवका लागि विदेश जानुभएका विद्वत्वर्ग एवम् युवालाई पनि आफ्नो माटोको सुगन्ध र मातृभूमिको माया सम्झेर आर्जित ज्ञान र सीप नेपालको दिगो विकासका लागि सदुपयोग गर्न अनुरोध गर्दछु।’
