बाराको सिम्रौनगढमा प्रहरीले गोली चलाउँदा घाइते भएका व्यक्तिको उपचारको क्रममा मृत्यु भएको छ।
बुधबार दिउँसो सिम्रौनगढ नगरपालिका परिसरमा प्रहरी र प्रदर्शनकारीहरूबीच झडप हुँदा प्रहरीले चलाएको गोली लागेर घाइते भएका युवकको मृत्यु भएको प्रमुख जिल्ला अधिकारी नवराज सापकोटाले जानकारी दिए।
मृतक सिम्रौनगढ-१ का अन्दाजी २१ वर्षीय लक्ष्मी मुखिया छन्।
प्रमुख जिल्ला अधिकारी सापकोटाका अनुसार उनको टाउकोमा गोली लागेको हो। बुधबार नयाँ प्रमुख प्रशासकीय अधिकृत हाजिर भएपछि आन्दोलनरत कर्मचारीहरूले मेयर किशोरी साह कलवारको गाडीमा तोडफोड गरेका थिए।
त्यहाँ लामो समयदेखि तलब नपाएको भन्दै कर्मचारीहरू आन्दोलनरत छन्। धर्ना दिइरहेको समयमा मेयर र प्रशासकीय अधिकृत आएपछि झडपको स्थिति बनेको थियो।
त्यसक्रममा प्रहरीले अश्रुग्यास र गोली चलाएको थियो। हवाइ फायर गर्नेक्रममा मृतकको टाउकोमा गोली कसरी लाग्यो भन्ने खुलेको छैन।
घाइतेको उपचारको लागि वीरगञ्जस्थित नारायणी अञ्चल अस्पतालमा लगिएको थियो। त्यहाँ उपचारको क्रममा मुखियाको मृत्यु भएको हो।
