जनकपुरमा विवाहपञ्चमीको चौथो दिन आज तिलकोत्सव मनाइँदैछ।
विवाह महोत्सवको पूर्वसन्ध्यामा आज तिलकोत्सवको अवसरमा जानकी मन्दिर प्राङ्गणबाट एक सय वटा भार लिएर साधुसन्तको समुह राम मन्दिर जाने कार्यक्रम छ।
आज दिउँसा जानकी मन्दिरबाट बाजागाजा सहित फलफूल, लत्ता कपडा, मिष्ठान्नसहित जानकी पक्षका साधुसन्त नगर परिक्रमा गरी राम मन्दिर पुग्ने कार्यक्रम रहेको जानकी मन्दिरका सहमहन्त रामरोशन दास वैष्णवले जानकारी दिए।
बाजागाजा तथा लावालस्करसहित निस्कने टोलीलाई आयोध्यावासीको तर्फबाट नगरवासीहरुले फूलमाला तथा अविर छर्केर स्वागत गर्ने परम्परा छ।
त्रेता युगमा मिथिलाका राजा जनक र अयोध्याका भगवान् श्री रामका बुवा राजा दशरथबीच भएको सम्धी मिलनको दिनलाई स्मरण गर्दै विवाह पञ्चमीको चौथो दिन तिलकोत्सव मनाइन्छ।
सप्ताहव्यापी विवाहपञ्चमी अन्तर्गत बिहीवार धनुष यज्ञ मनाइएको थियो। धनुष यज्ञ अवलोकन गर्न जानकी मन्दिरमा हजारौंको संख्यामा साधुसन्त तथा दर्शनार्थी भेला भएका थिए।
प्रत्येक वर्ष मंसिर शुक्ल पञ्चमीका दिन भगवान राम र आदर्शनारी सीताको डोलालाई सोयम्बर गरी विवाहपञ्चमी महोत्सव मनाउने गरिन्छ।
सप्ताहव्यापी विवाहपञ्चमी अन्तर्गत पहिलो दिन नगर दर्शन र दोस्रो दिन फूलबारी लीला विधि सम्पन्न भएको थियो। सप्ताहव्यापी रूपमा मनाउने रामजानकी विवाह महोत्सवको पाँचौं दिन शनिवार मटकोर मनाइने र छैटौं दिन पुस १ मा सीतारामको विवाह कार्यक्रम हुनेछ । पुस २ गते रामकलेवा गरी जन्ती एवं साधुसन्तलाई बिदाइ गर्दै विधिवत् रूपमा विवाह पञ्चमी महोत्सव समापन हुनेछ।
