जिल्ला प्रशासन कार्यालय काठमाडौंले निषेधित क्षेत्रको अवधि लम्ब्याएको छ।
बुधबार प्रमुख जिल्ला अधिकारी जितेन्द्र बस्नेतले आदेश जारी गर्दै थप दुई महिनाको लागि निषेधित क्षेत्र तोकिएको हो।
यसअघि प्रशासनले मंसिर ५ गते ३० दिनका लागि पाँच जनाभन्दा बढी भेला जम्मा भएर जुलुस, प्रदर्शन, धर्ना, घेराउ गर्न निषेध गर्दै निषेधित क्षेत्र तोकेको थियो।
प्रशासनले माइतीघर मण्डलदेखि बानेश्वरसम्म, शितल निवास, उपराष्ट्रपतिको हरित गृह, प्रधानमन्त्री निवास, संसद भवन नयाँ बानेश्वर र सिंहदरबार आसपासलाई लक्षित गरी निषेधित क्षेत्र तोकेको थियो।
गत मंसिर ७ गते मेडिकल व्यवसायी दुर्गा प्रसाईं र नेकपा एमाले निकट युवा संघले गरेको कार्यक्रममा दंगा नहोस् भन्ने उद्देश्यले प्रशासनले उक्त आदेश जारी गरेको थियो।
युवा संघको एकदिने कार्यक्रम थियो। दुर्गा प्रसाईंले पनि केही दिन प्रदर्शनलाई निरन्तरता दिए पनि पछिल्लो समय रोकिएको छ। तर प्रशासनले बुधबार पुन: निषेधित क्षेत्र लम्ब्याएको हो।
प्रमुख जिल्ला अधिकारी बस्नेतले कार्यपालिका, व्यवस्थापिका, न्यायपालिका, अतिविशिष्ट पदाधिकारी बसोबास गर्ने तथा कार्यालयलगायत आपसापका क्षेत्रमा पहिलेदेखि नै निषेधित क्षेत्र तोकिँदै आएको बताए।
‘पहिलेदेखि नै निषेधित क्षेत्र तोकिँदै आएको कुरालाई हामीले निरन्तरता दिएका हौं। नयाँ कुरा होइन,’ उनले भने, ‘माइतीघरदेखि बानेश्वरसम्मको क्षेत्रमा पनि सार्वजनिक सेवा प्रवाह हुने क्षेत्र, अतिआवश्यक काम हुने, सवारी आवागमन हुने ठाउँ भएकाले अलिकति समस्या हुने भन्ने आधारमा हामीले गरेका हौं।’
उनले प्रदर्शन गर्नको लागि भने त्यसबाहेकको ठाउँमा गर्न सकिने बताए। यसलाई निरन्तर निषेधित क्षेत्र नै तोकिरहने हो भन्ने सेतोपाटीको प्रश्नमा अहिलेलाई दुई महिनाको लागि मात्रै तोकिएको बताए।
‘अहिलेलाई दुई महिनाको लागि भनेर गरेका छौं। त्यसपछि परिस्थिति हेरेर हटाउँदै जान सकिन्छ,’ उनले भने।
सर्वोच्च अदालतले पनि अवधि नतोकी गरेको भन्ने सन्दर्भमा अनिश्चितकालका लागि निषेध गर्न नसकिने भन्दै आदेश जारी गरेको थियो। त्यसबारेमा पनि प्रमुख जिल्ला अधिकारी बस्नेत आफूहरूले कारण खुलाएर र अवधि तोकेर आदेश जारी गरेको बताए।
हेर्नुस् आदेश:
