सिन्धुलीमा बिजुलीको पोलमा बाँधेर महिलामाथि कुटपिट भएको घटनामा पक्राउ परेकाविरूद्ध शरीर बन्धक कसुरमा म्याद थप भएको छ।
कमलामाई नगरपालिका वडा नम्बर ५४ ढकाल गाउँकी शारदा थापामाथि कुटपिट गरेको आरोपमा पक्राउ परेका सात जनाविरूद्ध शरीर बन्धक कसुरमा म्याद थप भएको हो।
प्रहरीले बुधबार जिल्ला अदालत सिन्धुलीबाट ७ दिन हिरासतमा राखेर अनुसन्धान गर्न अनुमति पाएको जिल्ला प्रहरी कार्यालयका डिएसपी चिरञ्जीवि दाहालले बताए। पीडित शारदाले मंगलबार शरीर बन्धकसम्बन्धी कसुरमा जाहेरी दिएकी थिइन्।
गत आइतबार अपराह्न साढे ४ बजे प्रहरीले शारदाको उद्धार गरेको थियो। उद्धार गर्दा उनी अर्धचेत अवस्थामा बिजुलीको पोलमा बाँधिएको अवस्थामा फेला परेकी थिइन्।
शारदालाई बन्धक बनाएर कुटपिट गरेको आरोपमा श्रीमान् सन्तोष थापासहित ७ जना पक्राउ परेका थिए। उनीहरूको नाम प्रहरीले सार्वजनिक गरेको थिएन।
पक्राउ पर्नेमा ६२ वर्षीय एक्कबहादुर खड्का, ३१ वर्षीय मिलन देवकोटा, ३४ वर्षीय निकेश ढकाल, ४२ वर्षीय विष्णुकुमार ढकाल, ३८ वर्षीय ईश्वर पोखरेल र ५२ वर्षीय विक्रम ढकाल छन्।
उनीहरूले शरदालाई गत शुक्रबारदेखि बन्धक बनाएर कुटपिट गरेको आरोप छ।
यो पनि: सिन्धुलीमा तीन दिन बिजुलीको पोलमा बाँधेर महिलामाथि निर्घात कुटपिट
