तमु (गुरूङ) सञ्चारकर्मी संघले मुल धारको पत्रकारितामा सक्रिय गुरुङ समुदायका पत्रकारहरूलाई सम्मान गरेको छ।
तमु ल्होसारको पूर्वसन्ध्यामा काठमाडौंमा एक कार्यक्रमको आयोजना गरी संघले विभिन्न शिर्षकमा छ जना पत्रकारलाई सम्मान गरेको हो।
संघले प्रधानसेनापति छत्रमानसिंह–कमला गुरूङ पत्रकारिता पुरस्कारबाट चितवनका गुरुङ तर्फ हिरालाल गुरुङ र गैरगुरुङ तर्फ पोखराका एम. बि. आस्थालाई प्रदान गरेको छ।
यसैगरी तमू आदिकवि हर्कबहादुर गुरुङ स्मृति पत्रकारिता पुरस्कारबाट पोखराका रत्ना गुरुङ र लक्ष्मी गुरुङ पत्रकारिता पुरस्कारबाट कार्टुनिस्ट अनुप गुरुङ सम्मानित भएका छन्।
तनहुँकी करिश्मा गुरुङ सुश्री भद्राकुमारी घले पत्रकारिता प्रोत्साहन पुरस्कारबाट र धनकुटाका विकास गुरुङ तमू ल्होसार मूल आयोजक पत्रकारिता पुरस्कारबाट सम्मानित भएका छन्।
कार्यक्रमका प्रमुख अतिथि तथा राष्ट्रिय सूचना आयोगका प्रमुख आयुक्त महेन्द्रमान गुरुङ र संघका अध्यक्ष चित्रबहादुर गुरुङ लालाले उनीहरूलाई सम्मान गरेको हो।
कार्यक्रममार्फत गुरुङ न्युज डट कम वर्ष पुस्तक लोकार्पण पनि गरिएको छ। पुस्तकमा विभिन्न पेशा व्यवसाय र क्षेत्रमा आवद्ध गुरुङ समुदायका व्यक्तिहरू बारेको लेख प्रकाशित छन्।
