सिरहा जिल्ला अदालत परिसरमै मिटरब्याजी अभियुक्त श्याम निरौलाले दुई जना पीडितलाई कुटेपछि मिटरब्याज पीडितहरू रातभर जिल्ला प्रहरी कार्यालय अगाडि धर्ना बसेका छन्।
प्रहरीले निरौलाविरूद्ध जाहेरी दर्ता गर्न आनाकानी गरेको भन्दै पीडितहरू चिसोमा कार्यालय अगाडि धर्नामा बसेका हुन्।
बुधबार बकपत्रका लागि अदालत पुग्दा मिटरब्याज अभियुक्त निरौलाले पीडितद्वय सकुन्ती यादव र सुकुमारी साहलाई कुटपिट गरेको आरोप छ।
मिटरब्याज विरूद्धको संघर्ष समितिका केन्द्रीय संयोजक मनोज पासवानले सुरक्षाकर्मीकै अगाडि पीडितलाई कुटेका निरौलालाई प्रहरीले जोगाउन खोजेपछि आफुहरू धर्नामा बसेको बताए।
धर्ना बसेपछि मात्रै आज बिहान निरौलाविरूद्ध प्रहरीले जाहेरी दर्ता गरेको उनको दावी छ। उनीविरूद्ध पीडित ककुलतीदेवी यादवले दिएको ‘अपमानजनक अमानवीय व्यवहार सम्बन्धी कसुर’ शीर्षकमा जाहेरी जिल्ला प्रहरी कार्यालयमा दर्ता भएको छ।
यद्दपि प्रहरीले पीडितहरू साँझतिर जाहेरी दिएकाले मुद्दा दर्ता आज गरिएको जिल्ला प्रहरी कार्यालय सिरहाले जनाएको छ।
‘राति १० बजे मुद्दा दर्ता हुँदैन नि। आरोपीलाई हामीले हिजै अदालतबाटै नियन्त्रणमा लियौं, भोलि बिहान मुद्दा दर्ता हुन्छ भन्यौं तर जसरी पनि अहिले नै दर्ता भएको दर्ता नम्बर चाहियो भनेर कर गर्न थाल्नुभयो र धर्ना बस्नुभयो। जाहेरीमा तोक लगाउनुपर्छ त्यो राती कसरी हुन्छ,’ कार्यालयका प्रहरी निरीक्षक उदयरधान दुवेदीले भने।
विष्णुपुर गाउँपालिका-१ का बस्ने निरौलाविरूद्ध मिटरब्याज सम्बन्धी ३५ वटा उजुरी परेको छ।
केहि महिना अगाडि मात्रै उनी मिटरब्याज मुद्दामै पक्राउ परेका थिए। ३५ दिन थुनामा बसेपछि सिरहा जिल्ला अदालतले धेरौटीमा उनलाई छोड्न आदेश दिएको थियो। उनी छुटेयता पीडितहरूलाई धाकधम्की दिँदै आएको पासमानले बताए।
‘किन मुद्दा लगायौं भनेर उनले पीडितहरूलाई अनेक खालको हिंसा गरिरहेका छन्। मिटरब्याजीहरू कहिले पीडितको बाली जोतदिने कहिले जग्गा कब्जा गरिदिने त कहिले कुटपिट गरिदिने क्रम जारी छ। सिडियो र सहायक सिडियोले उनीहरूलाई संरक्षण गरिरहेका छन्,’ उनले भने।
मिटरब्याज विरूद्धको संघर्ष समितिले सिरहाका प्रमुख जिल्ला अधिकारी राजेन्द्रदेव पाण्डे र सहायक प्रमुख जिल्ला अधिकारी नरेशकुमार यादवको सरुवाको माग गरेको छ। मिटरब्याज सम्बन्धी परेको जाहेरी मिलापत्र गराउने जिम्मेवारी जिल्ला प्रशासन कार्यालयको छ। तर प्रमुख जिल्ला अधिकारी पाण्डे र सहायक जिल्ला अधिकारी यादवको शंकास्पद भूमिकाका कारण पीडितले न्याय नपाएकाले उनीहरूको सरुवा हुनुपर्ने पासमानले बताए।
‘आज जिल्लभरीका पीडितहरू जुट्दै छौं। जबसम्म सिडियो र सहायक सिडियोको सरूवा हुँदैन तबसम्म छलफलमा हामी पीडित नबस्ने घोषणा गर्न लागेका हौं। किनकी सिडियोको उठबस र हिमचिम मिटरब्याजी र विचौलियासँग छ,’ उनले थपे।
प्रमुख जिल्ला अधिकारी पाण्डेले भने कानुन अनुसार आफुहरूले छलफलमा निर्णय गरिरहेको बताए।
‘जसको विपक्षमा निर्णय हुन्छ उसले सिडियोले पैसा खायो भन्ने आरोप लगाइदिन्छ। यदि कुनै कर्मचारी वा मैले नै कहीँ बदमासी गरेको हो भने प्रमाण दिनुपर्यो नि। पाउँदैमा जे पनि आरोप लगाएर मात्रै हुन्छ त,’ उनले भने।
