रुकुम पश्चिमको सानी भेरी किनारको भीरबाट उद्धार गरिएका दुई जनामध्ये एक बालकको मृत्यु भएको छ।
बाफिकोट गाउँपालिका – २ पिपलका १३ वर्षीय १३ वर्षीय सुभाष विकको मृत्यु भएको छ। अचेत अवस्थामा उद्धार गरि जिल्ला अस्पताल सल्ले पुर्याइएका उनको शुक्रबार दिउँसो साढे १ बजेतिर मृत्यु भएको जिल्ला प्रहरी प्रवक्ता प्रहरी निरीक्षक धर्मेन्द्र खड्काले जानकारी दिए।
सोही ठाउँका १८ वर्षीय डिलु विक भने उपचारपछि घटना अनुसन्धान गर्न जिल्ला प्रहरी कार्यालयमा लगिएका छन्।
प्रहरी निरीक्षक खड्काका अनुसार बिहीबार बेलुकी साढे ८ बजेतिर उनीहरुलाई बाफिकोट – ४ छिनखेतस्थित सानी भेरी नदीको किरानको भीरबाट उद्धार गरी अस्पताल पुर्याइएको थियो।
मृतकको पोष्टमर्टम हुन बाँकी छ। प्रहरी नियन्त्रणमा रहेका डिलुले भने आँफुहरुले मदिरा सेवन गरी फर्किने क्रममा बाटो बिराएपछि सोही भीरमा बसेको बयान दिएका छन्।
चिसोले कठ्याङ्ग्रीएर १३ बर्षीय सुभाषको मृत्यु भएको हुन सक्ने अनुमान गरिएपनि पोष्टमर्टम पछि मृत्युको कारण पत्ता लाग्ने प्रहरी निरीक्षक खड्काले बताए।
