डाक्टर गोविन्द केसीले काठमाडौं मेडिकल कलेजका आवासीय चिकित्सक विशद दाहालमाथिको कारबाही यथाशीघ्र फिर्ता लिन माग गरेका छन्।
केएमसीले प्रक्रिया मिचेर आवासीय चिकित्सक दाहाललाई निलम्बन गरेपछि शनिबार विज्ञप्ति जारी गर्दै डा. केसीले उनीमाथिको कारबाही गलत भएकाले तत्काल फिर्ता लिन माग गरेका हुन्।
‘सबै तहमा अध्ययनरत विद्यार्थीहरुमाथि भइरहेको ज्यादती र ठगी तत्काल बन्द गर्न तथा नाजायज रुपमा निलम्बन लगायतका कारवाहीमा परेका विद्यार्थीहरुको कारवाही तत्काल फिर्ता गर्न माग गर्दर्छौं,’ विज्ञप्तिमा भनिएको छ।
उनले चिकित्सक उत्पादन गर्नेजस्तो संवेदनशील काममा यस्ता आपराधिक पृष्ठभुमिका मानिसहरु संलग्न हुनु तर पनि विधिको शासन कायम गर्न भनेर बनेका राज्यका निकायहरु आँखा चिम्लेर बसिरहनु, न्यायालयले छानी छानी राजनीतिक दलका अपराधीहरुलाई दया देखाउनु दुर्भाग्यको कुरा भएको बताएका छन्।
केएससीले बिहीबार विज्ञप्ति जारी गर्दै शिविरमा जान नमानेको भन्दै आवासीय चिकित्सक दाहाललाई अरू प्रक्रिया पूरा नगरी सिधै निलम्बन गरेको थियो।
डा. केसीले गेटामा तत्काल स्वास्थ्य विज्ञान प्रतिष्ठान शुरु गर्ने लगायतका मागहरु पूरा गर्न तथा साथै सर्वोच्च अदालतका कारण रोकिएको चिकित्सा शिक्षा आयोगका निर्देशकहरु पुर्ति गर्ने कामका लागि तत्काल बाटो खोल्न माग गरेका छन्।
सम्बन्धित समाचारः डाक्टर दाहालमाथि केएमसीको प्रतिशोध
