बाँकेको बैजनाथ गाउँपालिका-३ स्थित नौबस्ता बाल सुधार गृह तनावग्रस्त बनेको छ। आइतबार दिउँसो दुई समूहबीच झडप भएपछि सुधार गृहको माहोल तनावग्रस्त बनेको हो।
सुधारगृहका प्रमुख श्याम बहादुर राना अनुसार नेपालगञ्जबाट ल्याइएका टोली र त्यहाँ रहेका टोलीबीच तीन/चार दिन अघि पनि झडप भएको थियो।
त्यसक्रममा ४/५ जना घाइते समेत भएका थिए। हिजो पुनः झडप हुँदा स्थिति तनावपूर्ण बनेको प्रमुख रानाले बताए।
९ वर्षअघिको रिसिइबीलाई लिएर दुई समूहबीच झडप भएको उनले बताए।
‘धेरै ठाउँबाट बालकहरू ल्याएका थियौं, ९ वर्षअघि झगडा परेकाहरूको यहाँ भेट भएछ,’ उनले भने।
झडपपछि एक समूहले नेपालगञ्जबाट ल्याइएका समूहलाई अन्यत्र सार्न माग गरिरहेको प्रमुख रानाले बताए। उनीहरूले भवनमा सामान्य तोडफोड गरेका छन्।
प्रमुख रानाका अनुसार सुधारगृहको सुरक्षाका लागि प्रहरीको सईको नेतृत्वमा २५ जना नेपाल प्रहरी र ३० जना सशस्त्र प्रहरी खटिएका छन्। उनीहरू सबैलाई सुधार गृहमा रहेकाहरूले भित्र जान दिएका छैनन्।
सुधार गृह तनावग्रस्त बनेपछि आफूहरू आइतबार दिउँसो देखि नै त्यहाँ रहेको बाँकेका प्रहरी प्रवक्ता डिएसपी नारायण डाँगीले बताए।
सुधारगृहमा रहेका बालकहरूले त्यहाँको सुधार गृहको सुरक्षामा खटिएका सुरक्षाकर्मीहरूलाई भित्र जान नदिएको र उनीहरू कम्पाउन्डमा आएर हो-हल्ला गरिरहेको जानकारी दिए।
‘हामी हिजोदेखि नै यहीँ छौं, भित्र जान मिलेन। नेगोशियसन गर्ने प्रयास गर्दै छौं,’ डिएसपी डाँगीले भने।
उक्त बाल सुधार गृह असोजदेखि मात्रै सञ्चालनमा आएको हो। सरकारले १८ वर्षभन्दा माथिकालाई राख्नका लागि बनाएको यस सुधार गृहमा अहिले ११६ जना बालबन्दी छन्।
भैरहवा भन्दा १३ जना राखेर सुरू गरिएको बालसुधार गृहमा जयेन्दु बालसुधार गृहबाट ६९ जना, हेटौंडाबाट १८ जना, वीरगञ्जबाट १५ जना, भैरहवाबाट १४ जना ल्याइएका छन्।
उनीहरू सबै १८ वर्षभन्दा माथिका हुन्। अधिकांश व्यक्तिहरू जबरजस्तीकरणी र लागुऔषध र कर्तव्य ज्यान मुद्दामा सजाय पाएकाहरू छन्।
घटनाबारे प्रमुख जिल्ला अधिकारीलाई जानकारी गराइएको र छलफलबाट समस्या समाधान गरिने सुधार गृहका प्रमुख रानाले जानकारी दिए।
