मोरङको सुन्दरहरैंचामा एउटा जंगली हात्ती मृत फेला परेको छ।
सुन्दरहरैंचा नगरपालिका–१० को जनजागरण सामुदायिक वनमा करिब १२ वर्षको जंगली हात्ती मृत भेटिएको हो। हात्ती मृत भेटिएपछि घटनाबारे अनुसन्धान भइरहेको जिल्ला प्रहरी कार्यालय मोरङका प्रवक्ता डिएसपी रञ्जन दाहालले बताए।
प्रहरी र डिभिजन वन कार्यालय मोरङको टोली घटनास्थलमा पुगेर अनुसन्धान गरिरहेको र कोसीटप्पु वन्यजन्तु आरक्षबाट पशु चिकित्सकको टोली पनि पुगेको छ।
स्थानीयबासीले पासोमा पारेर हात्ती मारेको आशंका प्रहरीले गरेको छ। यद्यपि अनुसन्धान पूरा नभइ केही बताउन नसकिने प्रहरीको भनाइ छ।
केही समययता मोरङका राजमार्ग आसपासका जंगल क्षेत्रमा जंगली हात्तीको हुल नै बसिरहेको छ। स्थानीय जंगलमा विचरण गरिरहेका हात्तीले बेलबारी, पथरी शनिश्चरे क्षेत्रमा सर्वसाधारणलाई दुःख दिइरहेका छन्।
