काठमाडौं महानगर क्षेत्रभित्र सञ्चालित सबै पेट्रोल पम्पहरूले पहेँलो रंग अनिवार्य लगाउनुपर्ने भएको छ।
महानगरभित्र सञ्चालित पेट्रोल पम्पको अवस्था अध्ययन, अनुगमन तथा व्यवस्थापनका लागि गठन भएको समितिको बैठकले बिहीबार उक्त निर्णय गरेको हो।
समितिको बैठकले पेट्रोल पम्पको पहिचान तथा एक रूपताको लागि पहेँलो रंग लगाउनुका साथै पम्पमा कार्यरत नोजलमेनले अनिवार्य खैरो रंगको पिपिई लगाउनुपर्ने निर्णय गरेको छ।
यस्तै, सेवाग्राहीले देख्नेगरी निःशुल्क शौचालय उपलब्ध भएको बोर्ड झुन्डाउनुपर्ने बैठकले निर्णय गरेको छ। बैठकले पम्प परिसरमा हरियाली गराउनुपर्ने निर्णय गर्नुका साथै कर्मचारीहरूलाई महानगरले आधारभूत अग्नि नियन्त्रण तालिम दिने निर्णय गरेको छ।
पुस १९ गते बसेको बैठकले काठमाडौं महानगरभित्र सञ्चालनमा रहेका पेट्रोल पम्पहरूको अध्ययन गर्न महानगर प्रहरी उपरीक्षक विष्णुप्रसाद जोशीको संयोजकत्वमा ७ सदस्यीय समिति गठन भएको थियो।
उक्त समितिमा नेपाल आयल निगम, उपत्यका ट्राफिक प्रहरी कार्यालय, सडक विभाग, जिल्ला प्रशासन कार्यालय, पेट्रोलियम डिलर्स एसोसिएसन र रिपुमर्दिनी पेट्रोल पम्प भद्रकालीका प्रतिनिधि छन्।
