यौनिक तथा लैंगिक अल्पसंख्यक समुदायले वैवाहिक समानता नहुँदा समुदायको व्यक्तिहरूले आत्महत्या गर्न बाध्य भएको अधिकारकर्मी लक्ष्मी घलानले बताएकी छन्।
बागमती प्रदेशमा भएको अन्तरक्रिया कार्यक्रममा बोल्दै अधिकारकर्मी लक्ष्मी घलानले समलिंगी विवाहलाई समाजले स्वीकार नगरेकोले समलिंगी व्यक्तिहरूले आत्महत्या गर्नुपरेको बताएकी हुन्।
समुदायको वैवाहिक समानता मुद्दा नैसंर्गिक अधिकार भएकोले यो मानवअधिकारसँग जोडेको घलानले बताएकी छन्। समुदायको हक अधिकारको लागि काम गर्दै आएको संस्था मितिनी नेपालले आयोजना गरेको कार्यक्रममा समुदायका अधिकारकर्मीहरूले वैवाहिक समानताको न्यायबारे छलफल गरेका थिए।
समुदायको वैवाहिक समानताको अवस्था, आवश्यकता, वर्तमान कानुनी व्यवस्था र चुनौतिको बारेमा छलफल भएको थियो। साथै समुदायमा वैवाहिक समानता नहुँदा, सम्बन्ध स्थिर नहुने, सम्पत्तिमा दम्पत्तिको अधिकार नलाग्ने, विवाह दर्ता नहुने, जस्ता समस्या भएको कार्यक्रममा बताइएको छ।
कार्यक्रममा 'म्यारिज इक्वालिटी फर एलजिबिटिक्यूआइप्लस कम्यूनिटी नामक वेवसाइटको उद्घाटन गरिएको थियो। यो वेवसाइट नेपालमा पहिलोपटक बनेको हो। कार्यक्रममा डिएसपी कोपिला चुडाल, अधिवक्ता बिनु लामा, निलहिरा समाजको पदाधिकारीहरू लगायतको उपस्थित थियो।
