चेकिङको ड्युटी सकेर फर्किने क्रममा प्रहरीको भ्यानबाट खसेर प्रहरीले ज्यान गुमाएको घटनामा छानबिन समिति गठन भएको छ।
काठमाडौं उपत्यका प्रहरी कार्यालय रानीपोखरीका प्रमुख एआइजी दीपक थापाले एसएसपी दिनेश मैनालीको संयोजकत्वमा तीन सदस्यीय समिति गठन गरेका हुन्।
प्रहरीको रातको सुरक्षा योजना अनुसारको चेकिङ ड्युटी सकेर मोबाइल ड्युटीमा खटिएका सुर्खेत गुर्भाकोट न.पा. वडा नं. १२ सुवाकोट घर भई बलम्बुमा कार्यरत ३५ वर्षीय सहायक हवल्दार एलजीको मृत्यु भएको प्रहरीले जनाएको छ।
उनको मृत्यु भएपछि एआइजी थापाले तीन सदस्यीय समिति बनाएका हुन्। समितिमा काठमाडौं उपत्यका अपराध अनुसन्धान कार्यालयका एसपी मिलन केसी र जिल्ला प्रहरी परिसर काठमाडौंका डिएसपी अनिल अधिकारी सदस्य छन्। समितिलाई १० दिनको समय दिइएको छ।
बलम्बु प्रहरी कार्यालयको बा १ झ ७४१८ नम्बरको प्रहरी भ्यानमा ड्युटीको क्रममा नैकाप तर्फबाट प्रहरी कार्यालय बलम्बुतर्फ जाने क्रममा ११:१५ बजे बल्खु खोला सिप्रदीनजिक उक्त भ्यानको पछाडिबाट अकस्मात खस्दा एलजी घाइते भएका थिए।
तत्काल उद्धार गरी उनलाई घटनास्थल नजिकै रहेको मेड पोइन्ट अस्पतालमा लगिएको थियो। त्यहाँ उपचार सम्भव नभएपश्चात् नेपाल एपिएफ अस्पतालमा लगेर उपचार गराउँदा उपचारकै क्रममा उनको मृत्यु भएको अस्पतालले जनाएको छ।
मृतक एलजीको शव पोष्टमर्टमको लागि टिचिङ शिक्षण अस्पताल महाराजगञ्ज पठाइएको प्रहरीले जनाएको छ।
चालक सहायक हवल्दार रामप्रसाद यादवलाई प्रहरीले नियन्त्रणमा लिई थप अनुसन्धान गरिरहेको प्रहरीले जनाएको छ।
