काठमाडौंको गौशालास्थित गेष्ट हाउसमा महिला मृत फेला परेको घटनामा प्रहरीले एक जनालाई पक्राउ गरेको छ।
काठमाडौं महानगरपालिका वडा नम्बर ९ विजयचोकस्थित ‘सिराहा धनुषा होटल एन्ड लज’ मा शनिबार अपराह्न महिला मृत फेला परेकी थिइन्।
महिलाको हत्या गरेको आरोपमा प्रहरीले एक जनालाई पक्राउ गरेको जिल्ला प्रहरी परिसर काठमाडौंका एसएसपी भूपेन्द्र खत्रीले बताए।
रामेछाप घर भई बानेश्वर क्षेत्रमा बस्ने करिब २८ वर्षकी प्रमिला दमाई मृत फेला परेकी थिइन्। उनको हत्या आरोपमा प्रहरी वृत्त गौशालाको टोलीले बानेश्वर क्षेत्रबाट एक जना पुरूषलाई पक्राउ गरेको हो।
पक्राउ पर्नेको पहिचान प्रहरीले खुलाएको छैन, प्रहरीले सोमबार पत्रकार सम्मेलन गरी सार्वजनिक गर्ने तयारी गरेको छ।
मृतक महिला बानेश्वरमा श्रीमान् र ५ वर्षीय छोरासँग बस्दै आएकी थिइन्। गौशालाको उक्त गेष्ट हाउस पक्राउ परेका पुरूषले बुकिङ गरेको खुलेको छ।
पक्राउ परेका पुरूष र महिला प्रेमी रहेको प्रहरीको आशंका छ। प्रमिलाको हत्यापछि त्यहाँबाट पुरूष फरार भएको हुन सक्ने अनुमान छ।
धापासीमा एक पुरूष मृत फेला
शनिबार काठमाडौंको धापासीमा एक जना पुरूष मृत फेला परे। टोखा नगरपालिका-६ धापासीस्थित टहरामा डेरा गरी बस्ने ओखलढुंगा लिखु गाउँपालिका-३ का २३ वर्षीय दिपेश खड्का मृत अवस्थामा फेला परेका थिए। उनको पनि हत्या भएको प्रहरीको आशंका छ।
उनको टाउकोमा चोट देखिएपछि प्रहरी वृत्त महाराजगञ्जले अनुसन्धान गरिरहेको हो।
घटनामा संलग्न भएको हुन सक्ने आशंकामा प्रहरीले केही व्यक्तिमाथि सोधपुछ गरिरहेको छ। यसबारे पनि सोमबार नै पत्रकार सम्मेलन गरी सार्वजनिक गर्ने तयारी प्रहरीको छ।