३८ वर्षीय कुमार श्रेष्ठ जिल्ला प्रहरी परिसर काठमाडौंको हिरासतमा छन्।
दोलखा बैतेश्वर गाउँपालिका वडा नम्बर ७ घर भई काठमाडौं बस्दै आएका उनी आइतबार बानेश्वर क्षेत्रबाट पक्राउ परेका हुन्।
उनीमाथि रामेछाप लिखु गाउँपालिका-५ घर भई काठमाडौं बस्ने २८ वर्षीया पर्मिला दमाईको हत्या गरेको आरोप छ। पक्राउ परेपछि उनी पश्चातापमा छन्। उनले पर्मिलाको हत्या गरेको स्वीकारिसकेका छन्। तर यो घटना भएपछि आफैं पनि पीडामा छन्।
किनभने उनले आफ्नै प्रेमिकाको हत्या गरेका हुन्।
शनिबार साँझ ६ बजेतिर काठमाडौं महानगरपालिका वडा नम्बर ९ विजय चोकस्थित सिराहा-धनुषा गेष्ट हाउसको कोठा नम्बर १०८ मा एक जना महिलाको शव फेला परेको थियो।
प्रहरीको कन्ट्रोल नम्बर १०० मा फोन गरी होटलमा एक महिला मृत फेला परेको भन्ने जानकारी दिइएको थियो। उक्त खबरपछि प्रहरी वृत्त गौशाला र जिल्ला परिसर काठमाडौंको संयुक्त टोलीले अनुसन्धान अघि बढाएको थियो।
मृतकको अनुहारमा रगत थियो भने घाँटीमा नाइलनको डोरी कस्सिएको थियो। ती महिलाको हत्या नै भएको भन्नेमा प्रहरी निष्कर्षमा पुगिसकेको थियो।
प्रहरीले होटलमा ती महिलासँग एक जना पुरूष बस्दै आएको भन्ने जानकारी पाएको थियो। होटलमा पनि पुरूषकै नाममा उक्त कोठा दर्ता भएको खुलेको थियो।
सञ्जिब लामा नामबाट होटलमा इन्ट्री भएको थियो। त्यस्तै उनले नम्बर पनि टिपाएका थिए।
होटलमा टिपाएको नम्बरमा प्रहरीले सम्पर्क गर्दा एक जना प्रहरी अधिकृतकै नम्बर रहेको खुलेको जिल्ला प्रहरी परिसर काठमाडौंका एसएसपी भूपेन्द्रबहादुर खत्रीले जानकारी दिए।
‘होटलमा भएको नम्बर संयोगले प्रहरीकै भएको खुल्यो। जसपछि उनले दिएको विवरण नक्कली हो भन्ने थाहा भयो,’ उनले भने, ‘घटना हुनु तीन दिनअघि पनि त्यहीँ इन्ट्री भएको देखियो। त्यसपछि हामीले सिसिटिभी फुटेज लगायतबाट खोजी गर्न थाल्यौं।’
प्रहरीले सुरूमा मृतक महिलाको पहिचान खुलाउने प्रयास गरेको थियो। जसक्रममा ती महिला रामेछाप घर भई काठमाडौं बानेश्वरमा श्रीमान नस्से दमाईसँग बस्दै आएकी २८ वर्षीया पर्मिला हो भन्ने खुल्यो।
उनीमाथि सोधपुछपछि प्रहरीले कुमार श्रेष्ठबारे पत्ता लगाएको हो।
कुमार श्रेष्ठ पनि विवाहित नै हुन्। पर्मिलाको एउटा छोरा छ। कुमार र पर्मिलाबीच १ वर्षदेखि प्रेम सम्बन्ध थियो। उनीहरूको सम्बन्धबारे दुबै परिवारलाई थाहा थियो।
इलाका प्रहरी कार्यालय धोबी रामेछापमा दुबै परिवारलाई झिकाएर छलफल समेत भएको पाइएको छ। उक्त छलफलपछि दुबै पक्ष आआफ्नो परिवारसँग बस्ने भनेर सहमति जनाएको पनि प्रहरीले बताएको छ।
तर प्रहरीकै रोहबरमा छुट्ने सहमति जनाउँदा पनि उनीहरू छुट्टिन सकेनन्। बीचबीचमा लुकीछिपी कुराकानी र भेटघाट गरिरहन्थे।
असारतिर कुमार कामको सिलसिलामा भारत गएका थिए। त्यहाँ हुँदा दुई जनाबीचको कुराकानी बाक्लिएको थियो। पर्मिला आफ्ना श्रीमानसँग काठमाडौं बस्न आएको थाहा पाएपछि कुमार पनि काठमाडौं आए। कुमार जेठी छोरीसँग बस्न थालेका थिए।
एसएसपी खत्रीका अनुसार उनीहरूबीच प्रेम सम्बन्ध गहिरिएपछि लिभिङ टुगेदरमा समेत बसेका थिए। लोकन्थलीमा एक घरमा उनीहरू लिभिङ टुगेदरमा बसे। पुसमा कामको सिलसिलामा कुमार दोलखा गएपछि पर्मिला पनि आफ्नै श्रीमानकै डेरामा फर्किएकी थिइन्।
माघ ४ गते कुमार फेरि काठमाडौं फर्किए। काठमाडौं फर्किएको केही समयसम्म उनीहरूबीच सम्बन्ध राम्रो थिएन। तर पछि फेरि गेष्ट हाउसमा उनीहरूको भेट हुन थाल्यो। घटना हुनु दुई दिनअघि अर्थात् माघ २४ गते पनि सोही होटलको १०८ नम्बरको कोठामा बसेर फर्किएका थिए।
यसरी माघ २६ गते पनि उनीहरू त्यहाँ पुगे। त्यसदिन भने उनीहरूबीच झगडा परेको थियो। पर्मिलाले कुमारलाई सधैं बाहिर मात्रै बसेर नहुने भन्दै विवाह गरी भित्र्याउन भनेका थिए। कुमार विवाहित भएकाले विवाह गर्न आनाकानी गरिरहेका थिए।
त्यसैबीच निस्किन खोजेका कुमारलाई पर्मिलाले समाएकी थिइन्। त्यही क्रममा उनको कपडा च्यातियो। कुमारले एक्कासि पर्मिलाको कन्चटमा हिर्काउँदा पर्मिलाको टाउको ठोक्किएको थियो।
टाउको ठोक्किएर बेहोस भएपछि कुमारले नाइलनको डोरीले पर्मिलाको घाँटीमा कसेर हत्या गरेको प्रहरीले जनाएको छ। हत्यापछि उनी शुक्रबार राति नै त्यहाँबाट पर्मिलाको फोन लिएर फरार भएका थिए। शनिबार राति भने प्रहरीलाई घटनाबारे जानकारी भएको थियो।
जसको अनुसन्धानपछि आइतबार कुमार पक्राउ परेका हुन्। उनीबाट प्रहरीले पर्मिलाको फोन, च्यातिएको टिसर्ट पनि बरामद गरेको छ।
उनलाई जिल्ला प्रहरी परिसर काठमाडौंले सोमबार सार्वजनिक गरेको हो।
