विवादपछि रोकिएको नेकपा (एमाले) धादिङ जिल्ला अधिवेशन बिहीबार मतदान भइरहेको छ।
अहिले बिहान साढे सात बजेबाट मतदान सुरू भएको हो। इलेक्ट्रोनिक भोटिङमार्फत् मतदान भइरहेको र दुई बजेसम्म मत हाल्ने समय रहेको एमाले धादिङले बताएको छ।
११२ पदका लागि निर्वाचन भइरहेको हो। ५५ जना सदस्य निर्विरोध भइसकेको एमाले धादिङले जनाएको छ।
आगामी नेतृत्वका लागि निवर्तमान अध्यक्ष भूमि त्रिपाठी र प्रदेश कमिटी सदस्य रामकुमार अधिकारी समूह बनाएरै मैदानमा उत्रिएका छन्।
त्रिपाठी समूहबाट उपाध्यक्षमा अर्जुन श्रेष्ठ गोरखाली र सचिवमा राधिका सापकोटा अघि सारिएको छ।
त्रिपाठी समूहबाट खुला उपसचिवतर्फ भक्तबहादुर लामिछाने र महिलातर्फ उर्मिला रेग्मी रूपाखेती रहेकी छन्।
अधिकारी समूहबाट उपाध्यक्षमा रामकुमार आचार्य, सचिवमा हरिराम लोहनी, खुला उपसचिवमा दीपक खतिवडा र महिला उपसचिवमा खुपीकुमारी तामाङ उम्मेदवार बनेकी छिन्।
एमाले धादिङको नवौं अधिवेशन फागुन २१ गतेबाट सुरू भएको थियो। तर, फागुन २२ गते अध्यक्ष मण्डल र प्रतिनिधि मनोनीतमा विवाद भएको थियो।
फागुन २२ गते कुटाकुट भएपछि केन्द्रीय संगठन विभागले हस्तक्षेप गरेको थियो।
संगठन विभागले प्रतिनिधि विवाद निरूपण गरिदिएको एमाले धादिङले जानकारी दिएको छ।
त्रिपाठी र अधिकारी समूहबीच पाँच प्रतिशत प्रतिनिधि मनोनीतमा विवाद भएपछि संगठन विभागले यसको निकास खोजेको हो।
संगठन विभागले अधिकारी समूहका १० जना प्रतिनिधि मनोनीत गर्दै विवाद टुंग्याइदिएको एक नेताले बताए। उनकाअनुसार जिल्ला अधिवेशनमा प्रतिनिधिको संख्या ५ सय ७८ जना पुगेको छ।
एमाले सचिवालयले जेठ मसान्तभित्र जिल्ला अधिवेशन गरिसक्न परिपत्र गरेको छ। जसअनुसार अहिले धमाधम जिल्ला अधिवेशन भइरहेका छन्।
एमालेको दार्चुला, मुगु, दोलखा, महोत्तरी, रौतहट, दोलखा, बाजुरा, म्याग्दी जिल्लामा अधिवेशन सम्पन्न भइसकेका छन्। मुगुमा विवाद भएर संगठन विभागले निरूपण गरिरहेको छ।
दोलखा, महोत्तरी, रौटहटमा चुनावमार्फत् नेतृत्व चयन भइसकेको छ। धादिङमा निर्वाचन जारी छ।
