यौन व्यभिचार र पैसा असुलीको आरोपपछि एमालेले दुई जना केन्द्रीय सदस्यसँग राजीनामा मागेको छ।
महिलासँगको अडिओ सार्वजनिक भएपछि नेकपा (एमाले) ले केन्द्रीय सदस्यबाट ऐन महरलाई हटाएको छ।
ऐन महरको अडिओ केही समयअघि सार्वजनिक भएको थियो।
झन्डै दुई घन्टाको अडिओमा महरको हर्कत पुष्टि भएपछि उनलाई कारबाही स्वरूप राजीनामा दिन लगाइको एमालेका एक नेताले बताए।
उनले दिएको राजीनामा बिहीबार बसेको सचिवालय बैठकले स्वीकृत गरेको एमालेले जनाएको छ।
त्यस्तै बिहीबार बसेको सचिवालय बैठकले सिराज अहमद फारुकीलाई पनि राजीनामा गर्न लगाएर स्वीकृत गरिएको छ।
फारूकीले विदेश पठाइदिन्छु भनेर पैसा उठाएको र अलपत्र पारेको उजुरीपछि कारबाही गरिएको एक नेताले बताए। उनको पनि हर्कत पुष्टि भएपछि राजीनामा माग गरिएको एक केन्द्रीय नेताले बताए।
‘उहाँहरूलाई बर्खास्त गर्दा त्यसको कारण उल्लेख गर्नुपर्ने भएर राजीनामा मागिएको हो,’ ती केन्द्रीय नेताले भने, ‘अध्यक्षले भन्नुभएको पार्टी शुद्धीकरणको अभियान यहाँबाट सुरू भएको छ।’
यसअघिको बैठकमा एमाले अध्यक्ष केपी शर्मा ओलीले पार्टीमा विचलन देखा परेको भन्दै चिन्ता व्यक्त गरेको थियो। त्यही सचिवालयको बैठकमा उनले उठाएको पार्टीको शुद्धीकरण र सुदृढीकरणको अभियान फागुन ८ गतेदेखि सुरू हुने केन्द्रीय कमिटीको कार्यसूची बन्ने भएको छ।
