बारामा ट्रक र गाडी ठोक्किँदा दुई जनाको मृत्यु भएको छ।
बुधबार बिहान साढे ५ बजे जीतपुर सिमरा उपमहानगरपालिका वडा नम्बर १ आधाभार जंगलमा ट्रक र गाडी ठोक्किएको जिल्ला प्रहरी कार्यालयका डिएसपी दधिराम न्यौपानेले जानकारी दिए।
सिमराबाट हेटौंडा जाँदै गरेको ना ६ ख ३३५२ नम्बरको ट्रक र विपरीत दिशाबाट जाँदै गरेको बागमती प्रदेश ०१-०२६ च १३३४ नम्बरको बोलेरो गाडी ठोक्किएका हुन्।
बोलेरो गाडीमा पाँच जना सवार गम्भीर घाइते भएका थिए।
दुर्घटनाबाट नुवाकोट बिदुर नगरपालिका वडा नम्बर ९ कोल्नी बस्ने ३० वर्षीय सुजन मगराती र भारतीय नागरिक २८ वर्षीय चन्दन चौहानको मृत्यु भएको हो। उनीहरू दुबै जनाको उपचारको क्रममा एलएस न्यूरो अस्पतालमा मृत्यु भएको हो।
यस्तै, दुर्घटनाबाट गाडीमा सवार तीन जना भारतीय नागरिक घाइते छन्।
२२ वर्षीय राहुल चौधरी, १७ वर्षीय सुदिप चौहान र १९ वर्षीय रामलखन चौहान छन्।
प्रहरीले ट्रक चालक बारा परवानीपुर गाउँपालिका वडा नम्बर ४ चैनपुर घर भई जीतपुर सिमरा-२ हुलास टोल बस्ने ३० वर्षीय रवि पटेललाई नियन्त्रणमा लिएको छ। उनी पनि घाइते छन्। उनीहरूको एलएस न्यूरो अस्पतालमा उपचार भइरहेको छ।
