'मलाई पनि तिमीसँगै गणना गर: मेरो आवाजले अर्थ राख्छ' भन्ने नाराका साथ अपांगता भएका महिलाहरूको राष्ट्रिय सम्मेलन काठमाडौंमा सुरू भएको छ।
शुक्रबार सुरू भएको कार्यक्रम घोषणापत्र जारी गर्दै आइतबार सम्पन्न हुनेछ।
काठमाडौंमा भैरहेको कार्यक्रममा ७ प्रदेशबाट ३६ जना अपांगता भएका महिला र महिला एवं अपांगताको क्षेत्रमा काम गर्दै आएका राष्ट्रिय स्तरका संस्थाका प्रतिनिधि गरी ९० जना बढी कार्यक्रममा सहभागी भएको आयोजकले बताए।
महिला र अपांगताको क्षेत्रमा काम गर्दै आएका संस्थाहरू दलित महिला संघ (फेडो), राष्ट्रिय आदिवासी जनजाति अपांग महिला संघ नेपाल, नेत्रहीन महिला संघ नेपाल, एक्सेस प्लानेट नेपाल र पहिचान नेपालले अन्तर्राष्ट्रिय महिला दिवसको सन्दर्भमा संयुक्त रूपमा कार्यक्रम आयोजना गरेका हुन्।
उपसभामुख इन्दिरा रानामगर उद्घाटन गरेको कार्यक्रममा राष्ट्रिय सभा सदस्य पदम परियार, राष्ट्रिय महिला आयोगको अध्यक्ष कमला पराजुली, समावेशी आयोगका प्रतिनिधि लगायतको समेत उपस्थिति रहेको छ।
कार्यक्रममा बोल्दै उपसभामुख रानामगरले अपांगता भएका महिलाहरूको सवालहरूमा आफू चिन्तित रहेको र आफ्नो तर्फबाट नीतिगत तहबाट सक्दो सहयोग गर्ने बताइन्।
कार्यक्रममा बोल्दै दलित महिला संघ (फेडो) को अध्यक्ष कला स्वर्णकारले अपांगता भएका महिलाहरूको विविधता, अन्तर सम्बन्धताका सवाल, अर्थपूर्ण सहभागिता र न्यून प्रतिनिधित्व तथा सीमान्तकृत अपांगता भएका महिलाहरूको सवाल एवं समस्याहरूको पहिचान गरी सोको सम्बोधनको लागि नीति निर्माणमा निर्णायक तहका व्यक्ति र सरोकारवाला निकायहरूलाई दबाब दिने उद्देश्यले कार्यक्रमको आयोजना गरिएको बताइन्।
