शुक्रबारदेखि भरतपुर भ्रमण वर्ष–२०२४ सुरू भएको छ। नारायणी नदीको किनारमा प्रधानमन्त्री पुष्पकमल दाहालले भ्रमण वर्षको उद्घाटन गरे।
महानगरले पर्यटन प्रवर्द्धनका लागि ‘घुमौं भरतपुर’ अभियान सुरू गरेको हो। यसको उद्घाटन गर्दै प्रधानमन्त्री दाहालले यो अभियानले अर्थतन्त्र चलायमान बनाउन सघाउने बताए। उनले घुमौं भरतपुर अभियानले आन्तरिक तथा बाह्य पर्यटकको आगमन बढाउने र समग्र देशकै पर्यटन विकासमा मद्दत पुर्याउने बताए।
‘कोरोनाले पिल्सिएको अर्थतन्त्र र पर्यटनलाई सुधार गर्न यो कार्यक्रमले महत्वपूर्ण भूमिका खेल्छ,’ उनले भने, ‘चितवन पर्यापर्यटनको केन्द्र हो। भरतपुरमा पर्यापर्यटनसँगै अन्य धेरै पर्यटकीय गन्तव्यहरू पहिचान भएका छन्। तिनको प्रवर्द्धन गरी पर्यटनलाई उकास्न सकियो भने अर्थतन्त्रमा टेवा पुग्छ।’
उद्घाटन कार्यक्रमको प्रवर्द्धनका लागि पूर्वप्रधानमन्त्रीहरू केपी शर्मा ओली, माधवकुमार नेपाल, झलनाथ खनाल, शेरबहादुर देउवा र पूर्वमन्त्रिपरिषद्का अध्यक्ष खिलराज रेग्मी पनि उपस्थित भएका थिए। उनीहरू चारै जनाले भ्रमण वर्षले आर्थिक मन्दीबाट देशलाई उठाउन सहयोग पुर्याउने विश्वास व्यक्त गरे।
उद्घाटन समारोह सुरू हुनुअघि भरतपुरका विभिन्न स्थानबाट शोभा र्याली तथा झाँकी निकालिएको थियो। र्यालीमा हजारौं जना सहभागी थिए। उनीहरूले विभिन्न जातजातिको संस्कृति प्रदर्शन गरेका थिए।
मेयर रेनु दाहालले पर्यटनमार्फत् महानगरको दिगो आर्थिक विकासका लागि भ्रमण वर्ष सुरू गरिएको बताइन्।
उनले निजी क्षेत्र तथा संघसंस्थाहरूसँग मिलेर महानगर र आसपासका पर्यटकीय गन्तव्यहरूको प्रवर्द्धन गरिने बताइन्।
महानगरभित्रका मेघौली, पटिहानी, ज्ञानेश्वर, बिसहजारी ताल, देवघाटधाम, नारायणी नदीको किनार, चौकीडाँडाका साथै जिल्लाका अन्य पर्यटकीय गन्तव्य, नवलपुरको गैंडाकोट र देवघाट गाउँपालिकाका पर्यटकीय क्षेत्रको प्रवर्द्धन गर्नेगरी समन्वय गरिएको मेयर दाहालले बताइन्।
‘पर्यापर्यटन, धार्मिक तथा साँस्कृतिक पर्यटनमात्रै नभएर शिक्षा, स्वास्थ्य, विकास, सहकारी लगायतका क्षेत्रलाई पनि पर्यटनसँग जोडेर प्रवर्द्धन गर्दैछौं,’ उनले भनिन्,‘आन्तरिक तथा बाह्य पर्यटकलाई आकर्षित गर्न निजी क्षेत्रसँग मिलेर विभिन्न गतिविधि तथा प्याकेज तयार पारेका छौं।’
उनले पर्यटन प्रवर्द्धनको पनि उद्देश्य राखेर माडी नगरपालिकासँग भगिनी सम्बन्ध गाँसेको बताइन्।
माडीका विभिन्न धार्मिक तथा पर्यटकीय क्षेत्र, रत्ननगरको सौराहा, इच्छाकामनाको उपदरदाङगढी, गैंडाकोटको मौलाकालिका, देवघाट क्षेत्रलाई पनि प्याकेजमा राखेर प्रवर्द्धन गरिने उनले बताइन्।
उनले भ्रमण वर्षलाई नै मध्यनजर गरेर दियालो बंगला सर्वसाधारणका लागि खुला गर्न लागिएको बताइन्। दियालो बंगलाको स्तरोन्नति गर्न टेण्डर आह्वान भइसकेकाले आगामी वैशाख महिनाबाट सर्वसाधारणका लागि खुला गर्नेगरी काम अघि बढ्ने उनले बताइन्।
भ्रमण वर्षलाई मध्यनजर गरेर भरतपुर–१३ मा वन्यजन्तु उद्धार केन्द्र बनिरहेको छ। यहाँ उद्धार गरिएका संकटग्रस्त बाघलाई राखेर पर्यटकलाई देखाउने महानगरको प्रयास छ।
मेयर दाहालले अन्तर्राष्ट्रिय क्रिकेट रंगशालाको निर्माणका लागि केही दिनमै टेण्डर आह्वान भएर काम सुरू हुने बताइन्। बन्दै गरेको रंगशाला, नारायणी नदीमा चल्ने क्रुज सिप, चौकीडाँडाबाट हुने प्याराग्लाइडिङ, मौलाकालिका केबलकारले पर्यटकलाई आकर्षित गर्ने उनको दाबी छ।
‘साथै भ्रमण वर्षमा महानगरभित्र पर्ने पटिहानी र मेघौलीबाट चितवन राष्ट्रिय निकुञ्ज प्रवेश गर्ने आन्तरिक तथा बाह्य पर्यटकको संख्या बढ्ने अपेक्षा गरेका छौं,’ दाहालले भनिन्।
सन् २०२४ भित्रमा २ लाख विदेशी र ५ लाख आन्तरिक पर्यटकले भरतपुर भ्रमण गर्ने लक्ष्य महानगरको छ। महानगरभित्र दैनिक ७ हजार ५०० र समग्र चितवन तथा गैंडाकोट नगरपालिकामा गरेर दैनिक १५ हजार जना पर्यटकलाई राख्न सक्ने क्षमताका होटलहरू छन्।
भरतपुर भ्रमण वर्षलाई नेपाल पर्यटन बोर्डले प्रवर्द्धन गर्नेछ। भ्रमण वर्षको अवधिमा गर्ने भनेर ५१ वटा कार्यक्रमहरू तय भएको प्रमुख प्रशासकीय अधिकृत नरेन्द्रकुमार रानाले जानकारी दिए।
महानगरले सन् २०२४ को सुरूमै भ्रमण वर्षको उद्घाटन गर्न खोजेको थियो। तर त्यतिखेर भरतपुरमा बन्दै गरेको ६ लेन सडक अस्तव्यस्त रहेकाले दुई महिनापछि उद्घाटन गर्न लागिएको हो।
६ लेन सडक, नारायणगढ–बुटवल सडक, मुग्लिन–पोखरा सडकको अवस्थालाई मध्यनगर गर्दै उद्घाटन कार्यक्रम स्थगित गरिएको थियो। ६ लेन सडकले अझै पूर्णता पाएको छैन। अन्य सडक पनि सुस्त गतिमा बनिरहेका छन्।
