चितवनको रत्ननगरस्थित एकता शिशु निकेतनकी छात्रा शालीन पोखरेलको मृत्युपछि प्रहरीले नियन्त्रणमा लिएका प्रधानाध्यापकसहित तीनै जना मंगलबार धरौटीमा छुटेका छन्।
विद्यालयको छात्राबासमा १४ वर्षीया शालीन झुण्डिएको अवस्थामा भेटिएपछि प्रहरीले प्रधानाध्यापक बालहरि देवकोटा, सहप्रधानाध्यापक किरणबहादुर अधिकारी र होस्टल वार्डेन कमलप्रसाद शर्मालाई नियन्त्रणमा लिएको थियो। शालीनको हत्यामा उनीहरू दोषी रहेको भन्दै बाबु दिपेन्द्र पोखरेलले प्रहरीमा जाहेरी दिएका थिए।
गत फागुन १२ गते शालीन मृत भेटिएपछि प्रहरी हिरासतमा रहेका तीनै जना छुटेका हुन्।
न्यायाधीश रमेशप्रसाद ज्ञवालीको इजलासले प्रधानाध्यापक बालहरि देवकोटालाई ३ लाख, सहप्रधानाध्यापक किरणबहादुर अधिकारीलाई र होस्टल वार्डेन कमलप्रसाद शर्मालाई ५/५ लाख धरौटी बुझाएर छाड्न आदेश दिएको हो।
प्रहरीले गत शुक्रबार अनुसन्धान सकेर सरकारी वकिलको कार्यालयमा फाइल बुझाएको थियो।
जिल्ला प्रहरी कार्यालय चितवनका सूचना अधिकारी डिएसपी श्रीराम भण्डारीकाअनुसार शालीनको पोष्टमर्टम रिपोर्टबाट झुण्डिएर आत्महत्या गरेको देखिएको छ।
परिवारले बलात्कार र हत्याको दाबी गर्दै ज्यानसम्बन्धी कसुरमा किटानी जाहेरी दिए पनि पोष्टमर्टमको रिपोर्टबाट त्यस्तो नदेखिएको भण्डारीले बताए। साथै शालीनको नोट कपी, उत्तर पुस्तिका र सुसाइड नोटको परीक्षण गर्दा सुसाइड नोट उनी आफैंले लेखेको पाइएको उनले बताए।
सरकारी वकिलको कार्यालयले आइतबार चितवन जिल्ला अदालतमा आत्महत्या गर्न दुरूत्साहन दिएको मुद्दामा अभियोजन गरेको थियो।
सम्बन्धित समाचार:
चितवन घटना: फेला परेको नोट शालीनले नै लेखेको रिपोर्ट
शालीन मृत्यु प्रकरण: प्रधानाध्यापकसहित तीन जनालाई थप चार दिन हिरासतमा राख्न अनुमति
प्रहरीको पहरामा पढिरहेका छन् शालीनका साथीहरू