सुर्खेतमा युनिसेफ नेपालको फिल्ड कार्यालय स्थापना गरिएको छ।
मंगलबार कर्णाली प्रदेश फिल्ड कार्यालयको उद्घाटन गरिएको हो। युनिसेफका नेपाल प्रतिनिधि एलिस आकुंगाले फिल्ड कार्यालयको उद्घाटन गरेकी हुन्।
उद्घाटनका क्रममा आकुंगाले कार्यालय स्थापनासँगै कर्णाली प्रदेशका बालबालिका तथा समुदायसँग नजिक भएर काम गर्नका लागि युनिसेफ एक कदम अघि बढेको बताईन्। नेपालमा काम गर्न थालेदेखि नै युनिसेफको उद्देश्य कुनै पनि बालबालिका पछाडि नपरुन् भन्ने रहेको उनले बताइन्।
नेपालका दुर्गम क्षेत्रहरूका पहुँच नपुगेका बालबालिका र उनीहरूको परिवारसम्म सेवा पुर्याउन युनिसेफले पछिल्ला दशकहरूमा कार्यक्रम विस्तार गरिरहेको उनले बताइन्। उनले कर्णाली प्रदेशको विकटताका कारण समुदाय तथा किशोरकिशोरीको उज्ज्वल भविष्यलाई असर पारेको बताइन्।
‘प्राकृतिक रूपमा धनी भएपनि कर्णाली प्रदेशमा विकटता कायमै छ, प्रदेशले अझ पनि महत्वपूर्ण चुनौतीको सामाना गर्नुपरेको छ,’ उनले भनिन्, ‘जसले यहाँको जनसंख्या, विशेषगरि बालबालिका तथा किशोरकिशोरीहरूको समग्र विकासलाई असर गरेको छ।’
युनिसेफका कार्यक्रमहरू सहयोगी मात्र नभएर सबै तहका सरकारसँग सहकार्य र साझेदारीमा अगाडि बढाइने नेपाल प्रतिनिधि आकुंगाले बताइन्।
यसअघि नेपालगञ्जमा भएको कार्यालयमार्फत कर्णाली प्रदेशमा काम गर्दा कर्णालीका अगुवाहरूले प्रदेशभित्रै कार्यालय स्थापना गर्नुपर्ने सुझाव दिएपछि त्यसलाई मनन गरिएको उनले बताइन्।
कार्यालय उद्घाटनका क्रममा बोल्दै कर्णाली प्रदेश स्वास्थ्य सेवा निर्देशक डा. रविन खड्काले बालबालिका र शिक्षाको क्षेत्रमा गर्न बाँकी काम युनिसेफसँग मिलेर सहज रुपमा गर्न सकिने बताए।
मुख्यमन्त्री कार्यालयका सचिव आनन्द सारूले कर्णाली प्रदेशमा युनिसेफको कार्यालय स्थापना भएसँगै नतिजामुलक काम गर्ने अपेक्षा गरिएको बताए।
