युद्धविराम उल्लंघन गरेको आरोप लगाउँदै इसराइलले गर्‍यो गजामा हवाई हमला

कम्तिमा २६ जनाको मृत्यु

सेतोपाटी

कात्तिक १२

इसराइलले गजामा हवाई हमला गरेको छ।

हमासले युद्धविराम उल्लंघन गरेको आरोप लगाउँदै मंगलबार इसराइलको विभिन्न भूभागमा मंगलबार हवाई हमला गरेको हो।

हमलाबाट कम्तिमा २६ जनाको मृत्यु भएको अन्तर्राष्ट्रिय समाचार संस्था रोयटर्सले जनाएको छ।

यो हमला गजामा अमेरिकी मध्यस्थतामा युद्धविराम घोषणा भएको तीन साता नबित्दै भएको हो।

रोयटर्सका अनुसार गजाको बुरेज शरणार्थी शिविरमा एक घरमा भएको विस्फोटमा पाँच जना, गाजाको सब्रा टोलमा एक भवनमा चार जना र खान युनिसमा गुडिरहेको गाडीमा हवाई हमला हुँदा पाँच जना मारिएका छन्।

आक्रमणहरू बुधबार बिहानैसम्म पनि जारी रहेको प्रत्यक्षदर्शीहरूले जनाएका छन्।

प्रधानमन्त्री बेन्जामिन नेतान्याहुले सेनालाई गजामा शक्तिशाली प्रहार गर्न आदेश दिएको बताएको छ। सेनाले तत्काल टिप्पणी नगरे पनि एक इसराइली सैन्य अधिकारीले हमासले इसराइली नियन्त्रण क्षेत्रभित्र आक्रमण गरी युद्धविराम तोडेको दाबी गरे।

नेतान्याहुले मंगलबारै हमासले बन्धकको भनेर गलत शवहरू हस्तान्तरण गरी युद्धविराम उल्लङ्घन गरेको आरोप पनि लगाएका थिए।

हमासले भने नेतान्याहुको आरोप अस्वीकार गर्दै आफू अझै पनि युद्धविराम सम्झौतामा प्रतिबद्ध रहेको जनाएको छ।

हमासको सशस्त्र शाखा अल–कसाम ब्रिगेडले इसराइलको युद्धविराम उल्लङ्घनका कारण बन्धकको शव हस्तान्तरण स्थगित गरेको बताएको छ।

गत अक्टोबर १० देखि लागू भएको अमेरिकी–समर्थित युद्धविरामले २०२३ अक्टोबर ७ का हमास–आक्रमणपछि दुई वर्षदेखि चलिरहेको युद्ध अन्त्य गरेको थियो।

सम्झौता अनुसार हमासले बाँकी जीवित बन्धकहरूलाई फिर्ता गरेको र इस्रायलले करिब २ हजार प्यालेस्टिनी कैदीहरूलाई रिहा गरेको थियो।

तर पछिल्ला दिनहरूमा दुबै पक्षले एकअर्कामाथि युद्धविराम उल्लङ्घनको आरोप लगाउँदै आएका छन्। अमेरिकी उपराष्ट्रपति जेडी भान्सले साना झडपहरू बाहेक युद्धविराम कायम रहने” विश्वास व्यक्त गरेका छन्।

गाजा सिटीमा मंगलबारको आक्रमणमा अल शाइफा अस्पताल नजिक रहेको एउटा आवासीय भवनमा चार जनाको मृत्यु भएको र अस्पताल पनि क्षतिग्रस्त भएको गाजाका अधिकारीहरूले बताएका छन्। मध्य गाजाको जावैदामा तम्बुमा भएको अर्को आक्रमणमा दुई जना घाइते भएका छन्।

यसैबीच, बन्धकका शव खोज्ने प्रयास तीव्र बनेको छ। इजिप्टबाट पठाइएका भारी मेसिनहरू खान युनिस र नुसैरात क्षेत्रमा सुरुङभित्र शव खोज्न प्रयोग भइरहेका छन्। केही शवहरू हमासको भूमिगत सुरुङ सञ्जालभित्र रहेको विश्वास गरिएको छ।

गाजा स्वास्थ्य मन्त्रालयका अनुसार हालसम्म इसराइली आक्रमणमा ६८ हजारभन्दा बढीको मृत्यु भइसकेको र हजारौं हराइरहेका छन्।

इसराइलले २०२३ को अक्टोबर ७ मा हमास–आक्रमणपछि युद्ध सुरु गरेको थियो, जसमा १ हजार २०० इसराइली मारिएका र २५१ जना गाजामा बन्धक बनाइएका थिए।