स्वीट्जरल्याण्डको चर्चित स्की रिसोर्ट क्रान्स–मोन्टानास्थित ले कन्स्टेलेसन बारमा नयाँ वर्ष २०२६ को पूर्वसन्ध्यामा भएको भीषण आगलागी हुँदा कम्तिमा ४० जनाको मृत्यु भएको छ।
घटनामा ११९ जना घाइते भएका छन्। तीमध्ये धेरैको अवस्था गम्भीर रहेको भनेर अन्तर्राष्ट्रिय सञ्चारमाध्यमहरूले समाचार लेखेका छन्।
स्थानीय अभियोजक बेअट्रिस पिल्लोले शुक्रबार आयोजित पत्रकार सम्मेलनमा आगलागीको कारणबारे प्रारम्भिक अनुसन्धानबाट खुलेको विषय सार्वजनिक गरेकी छन्।
आगलागीको कारण श्याम्पेन बोतलमा राखिएको स्पार्कलर (फोहोरा मैनबत्ती) हुनसक्ने उनले बताएकी छन्। अन्तर्राष्ट्रिय समाचार संस्था रोयटर्सका अनुसार युवाहरूले नयाँ वर्षको खुसीमा स्पार्कलर जडित श्याम्पेनका बोत्तल छतनजिक पुर्याएका थिए। त्यसबाट छतमा आगो सल्कलिएको र त्यो तुरून्तै फैलिएको बताइएको छ।
अमेरिकी टेलिभिजन नेटवर्क सिएनएनले आगलागी अघिको दृश्यको भिडिओ फुटेज सार्वजनिक गरेको छ।
एउटा भिडिओमा केही युवाहरू एक अर्काको काँधमा बसेर स्पार्कलर जडित बोत्तलबाट श्याम्पेन उडाइरहेका देखिन्छन्।
अर्क भिडिओमा छतमा आगो लागिसकेको र एक युवक आफ्नो टी-सर्टले आगोलाई हिर्काउँदै निभाउने दुष्प्रयास गरिरहेको देखिन्छ। त्यसबाट आगो झन् फैलिएको दृश्य पनि सिएनएनले सामाजिक सञ्जालबाट संकलन गरी प्रसारण गरेको भिडिओ फुटेजमा देखिएको छ।
अभियोजक पिल्लोका अनुसार बारबाट बाहिर निस्कने बाटो अत्यधिक साँघुरो भएकाले पनि आगलागीपछि भित्र रहेका युवाहरू झट्टै बाहिर निस्कन पाएनन्।
श्याम्पेनको स्पार्कलर छतमा ठोक्किएपछि त्यसबाट आगो टिपेको र आगो छतमा पुगेपछि ‘फ्ल्यासओभर’ नामक प्रक्रियाबाट केही सेकेन्डमै सम्पूर्ण क्लब आगोले ढाकिएको विज्ञहरूको भनाइ छ।
छतमा प्रयोग गरिएको ध्वनि नियन्त्रण तथा इन्सुलेसन फोम अत्यधिक ज्वलनशील भएकाले आगो झनै तीव्र गतिमा फैलिएको हुन सक्ने आशंकामा त्यसको पनि जाँच भइरहेको छ।
प्रत्यक्षदर्शीहरूका अनुसार आगो लागेपछि क्लबभित्र रहेका मानिसहरू साँघुरो सिँढी र निस्कने ढोकातर्फ दौडिएका थिए। एक मात्र साँघुरो ढोकामा मानिसहरू अड्किएपछि भागदौड र च्यापाच्याप भएको थियो।
१७ वर्षीया लाएटिसिया ब्रोडार–सित्रेले साँघुरो ढोकामा मानिसहरू एकअर्कामाथि खसेको, केही जलेको र केहीको मृत्यु भइसकेको दृश्य देखेको सिएनएनसँग बताएकी छन्।
बेसमेन्टमा रहेका एक्सेल नामका एक युवकले आफू “चमत्कारिक रूपमा” बाँच्न सफल भएको बताए।
आगो सल्किएपछि सुरुमा गम्भीर खतरा नठानेको उनले बताएका छन्।
तर केही क्षणमै कालो धुवाँले सास फेर्नै गाह्रो भएपछि टेबल पल्टाएर त्यसको आड लिए र पछि झ्याल फुटाएर बाहिर निस्किएको उनले बताएका छन्।
घटनापछि स्विस आपतकालीन सेवाले केही मिनेटमै उद्धार कार्य सुरु गरेको थियो। घाइतेमध्ये करिब ५० जनालाई जर्मनी, फ्रान्सलगायत युरोपका अन्य देशका विशेष बर्न युनिट भएका अस्पतालमा सारिएको छ।
प्रहरीका अनुसार घाइतेमध्ये ११३ जनाको पहिचान भइसकेको छ।
तीमध्ये ७१ जना स्विस, १४ फ्रान्सेली, ११ इटालियन, चार सर्बियन तथा अन्य बोस्नियन, बेल्जियन, पोलिस, पोर्चुगिज र लक्जेम्बर्गका नागरिक छन्।
मृतकको पहिचान भने अझै कठिन भइरहेको छ।
जलन अत्यन्त गम्भीर भएकाले सबै मृतकको नाम सार्वजनिक गर्न केही दिन लाग्न सक्ने अधिकारीहरूले बताएका छन्।
मृतक र घाइतेको संख्या अन्तिम नभएको पनि जनाइएको छ।
आगलागीमा मृत्यु हुने पहिलो सार्वजनिक रूपमा पहिचान गरिएका व्यक्ति १६ वर्षीय इटालियन अन्तर्राष्ट्रिय गल्फ खेलाडी इमानुएले गालेप्पिनी हुन्।
इटालियन गल्फ महासंघले उनको निधनप्रति शोक व्यक्त गरेको छ।
इटालीका विदेशमन्त्री एन्टोनियो ताजानीका अनुसार १३ इटालियन अस्पतालमा उपचाररत छन् भने छ जना अझै बेपत्ता छन्। फ्रान्सेली दूतावासले आठ फ्रान्सेली नागरिक सम्पर्कविहीन रहेको जनाएको छ।
घटनाले स्विट्जरल्याण्डभर शोक र स्तब्धता फैलिएको छ।
बारतर्फ जाने सडकमा स्थानीय बासिन्दा र आगन्तुकहरूले फूल र मैनबत्ती राखेर अस्थायी स्मृतिस्थल बनाएका छन्।
‘यो हामी पनि हुन सक्थ्यौं,’ जिनेभाकी १८ वर्षीया एम्माले सिएनएनसँग भनेकी छन्।
अनुसन्धान अधिकारीहरूले आगलागी कसरी यति छिटो फैलियो, संरचनागत कमजोरी थियो वा सुरक्षा मापदण्ड उल्लंघन भएको थियो भन्नेबारे विस्तृत छानबिन गरिरहेका छन्।
अभियोजक पिल्लोले लापरबाही पुष्टि भएमा कानुनी कारबाहीको प्रक्रिया अघि बढाउने बताएकी छन्।
-1746009348.jpg)
