कोलम्बियाका राष्ट्रपति गुस्ताभो पेट्रोले अमेरिकाले भेनेजुएलामा मिसाइल हानेको आरोप लगाएका छन्।
भेनेजुएलाको राजधानी लगायतका क्षेत्रमा ठूलो विस्फोट सहित धुवाँका बाक्लो मुस्लो आकाशमा मडारिएको दृश्य सार्वजनिक भएपछि राष्ट्रपति पेट्रोले भेनेजुएला अमेरिकी हमलामा परेको बताएका हुन्।
भेनेजुएलामा विस्फोट कसले गरायो भन्ने विषयमा अझै खुलेको छैन। साथै विस्फोट कसरी भयो भन्ने पनि खुलेको छैन।
ट्रम्प प्रशासनका कडा आलोचक मानिने कोलम्बियन राष्ट्रपति पेट्रोले भने त्यसलाई अमेरिकी मिसाइल हमला भनेका छन्।
'कराकासमा बमबारी भइरहेको छ। संसारभर सतर्क गराऔं। भेनेजुएलामाथि आक्रमण भएको छ। मिसाइलमार्फत बमबारी भइरहेको छ,' उनले लेखेका छन्।
उनले संयुक्त राष्ट्र सुरक्षा परिषद्को बैठक तत्काल बोलाउनुपर्ने बताएका छन्। साथै कुकुटामा एकीकृत कमाण्ड पोस्ट सक्रिय भइसकेको पनि उनले बताएका छन्।
ह्वाइट हाउस र पेन्टागनले भने अझै पनि आक्रमणबारे कुनै प्रतिक्रिया दिएको छैन।
भेनेजुएलाले पनि यसमा अमेरिकामाथि आरोप लगाउँदै घटनाको निन्दा गरेको छ।
भेनेजुएलाका राष्ट्रपति निकोलस मादुरोले त्यसलाई अमेरिकाले गरेको अत्यन्त गम्भीर सैन्य हमलाको संज्ञा दिएका छन्।
भेनेजुएली सरकारका अनुसार कराकससँगै मिरान्डा, अरागुवा र ला ग्वाइरा राज्यमा एकैसाथ आक्रमण भएको थियो।
आक्रमणपछि राष्ट्रपति मादुरोले देशभर आपतकाल घोषणा गरेको र आफ्नो रक्षा बलहरू परिचालन गरेको अमेरिकी टेलिभिजन नेटवर्क सिएनएनले जनाएको छ।
उनले आवश्यक समय र परिस्थितिअनुसार सबै राष्ट्रिय रक्षा योजनाहरू कार्यान्वयन गर्न आदेश दिएको जनाइएको छ।
साथै, देशको सार्वभौमिकता र सुरक्षाका लागि सामाजिक तथा राजनीतिक शक्तिहरूलाई एकजुट भएर प्रतिरक्षामा उत्रिन आह्वान गरेका छन्।
'भेनेजुएलाका जनता र बोलिभेरियन राष्ट्रिय सशस्त्र बल लोकप्रिय–सैन्य–प्रहरी एकतासहित सार्वभौमिकता र शान्ति सुनिश्चित गर्न तैनाथ भएका छन्,' विज्ञप्तिमा भनिएको छ।
सरकारले अमेरिकाको कदमको कडा निन्दा गर्दै संयुक्त राष्ट्रसंघको सुरक्षा परिषद्, महासचिव र अन्य अन्तर्राष्ट्रिय निकायहरूमा औपचारिक उजुरी दर्ता गर्ने जनाएको छ।
ती निकायहरूमार्फत अमेरिकाको आक्रमणको अन्तर्राष्ट्रिय स्तरमै भर्त्सना गरिनुपर्ने माग भेनेजुएलाले अघि सारेको छ।
अमेरिकी राष्ट्रपति डोनाल्ड ट्रम्प प्रशासनले मादुरो सरकारमाथि मानवअधिकार उल्लंघन, चुनावी धाँधली र लागुऔषध तस्करीको आरोप लगाउँदै भेनेजुएलाको सरकार परिवर्तवन आवश्यक रहेको बताउँदै आएका छन्।
उनले मदुरोलाई सत्ताबाट हटाउन विभिन्न किसिमले दबाब दिँदै आएका छन्।
भेनेजुएलाले ती आरोप अस्वीकार गर्दै अमेरिकाले आफ्नो तेल स्रोतमा पहुँच जमाउन सरकार परिवर्तनको प्रयास गरिरहेको दाबी गर्दै आएको छ।
गत महिना अमेरिकाले भेनेजुएलातर्फ जाने–आउने प्रतिबन्धित जहाजमाथि कडा अवरोध (ब्लकेड) घोषणा गरेको थियो।
क्यारेबियन क्षेत्रमा अमेरिकी सैन्य उपस्थिति बढाइएको र लागुऔषध तस्करीको आरोपमा विभिन्न जहाजमाथि आक्रमण गरिएको घटनाले पनि दुई देशबीचको तनाव झन् चर्किएको थियो।
-1746009348.jpg)
