नोबेल मेडिकल कलेज तथा काठमाडौं मेडिकल कलेजका सञ्चालकसमेत रहेका मोरङ ३ का निवर्तमान सांसद डा. सुनिल शर्माले मोरङको रतुवामाई नगरपालिका–९ मा रहेको जनता माध्यमिक विद्यालयको नयाँ भवन बनाइदिने भएका छन्।
शर्माले दुई करोड रुपैयाँ लगानीमा विद्यालयमा नयाँ २ तले आधुनिक पक्की भवन बनाइदिने भएका हुन्।
यो विद्यालयका पूर्वविद्यार्थी शर्माले भवन बनाइदिने घोषणा गरेको विद्यालय २०२२ सालमा स्थापना भएको हो।
संघीय शिक्षा नियमावली तथा स्थानीय शिक्षा नियमावली अनुसार २ करोड बराबरको जिन्सी तथा नगद विद्यालयको खातामा जम्मा गर्ने व्यक्तिले विद्यालयको नाम परिवर्तन गर्न सक्ने प्रावधान अनुसार डा. शर्माले सो विद्यालयको साबिकको नाम परिवर्तन गर्दै आफ्ना बुवाआमाको नाम पनि थपेका छन्।
शर्माका बुवा लोकनाथ र आमा होमादेवी न्यौपानेको नाम थपिएर विद्यालयको नाम जनता लोकनाथ होमादेवी मावि भएको घोषणा पनि भएको छ।
५–५ कोठाको २ तले भवनको सोही विद्यालयका पूर्वविद्यार्थी समेत रहेका शर्माले २ करोड बराबरको लागतमा भवन निर्माण गरी विद्यालयलाई हस्तान्तरण गर्ने विद्यालयका प्रधानाध्यापक ईश्वर खनालले जानकारी दिए।
उनका अनुसार १ वर्षभित्र भवन निर्माण पूरा गरी विद्यालयलाई हस्तान्तरण गर्ने छन्। पुस १३ गते विद्यालय नाम परिवर्तनको सम्पूर्ण प्रक्रिया पूरा गरिएको थियो।
विद्यालयको नयाँ भवन बनाउन २ करोड लाग्ने अनुमान गरेर काम अघि बढाए पनि हाल ३ करोडभन्दा बढी लाग्ने सक्ने बताउँदै, शर्माले भने, ‘भवन सम्पन्न गर्दा जति खर्च लागे पनि भवन तयार पूरा गरेर मात्रै हस्तान्तरण गर्नेछु।’
विद्यालयका संस्थापक स्वर्गीय नरेन्द्रबहादुर थापाको नाममा ५० लाख र हजुरबुवा र हजुरआमाको नाममा २५–२५ लाख गरी १ करोड रुपैयाँ राशिको छात्रवृत्ति कोष स्थापना गर्ने घोषणा पनि गरेका छन्।
विद्यालयका विद्यार्थी, शिक्षकलाई विराटनगरको नोबेल अस्पतालमा उपचार गर्दा विशेष सहुलियत दिने समेत उनले बताए ।
-1746009348.jpg)
