पर्साको वीरगञ्जमा विरोध प्रदर्शनको क्रममा प्रहरीसँग झडप हुँदा प्रहरीले केही अश्रुग्यास प्रहार गरेको छ।
आइतबार बिहानैदेखि मुस्लिम समुदायले बिहानैदेखि सडकमा टायर बालेर प्रदर्शन गरेका हुन्। वीरगञ्जको घण्टाघर, मुर्ली, मालपोत चोक, छपकैया इदगाह चोक लगायतका स्थानमा उनीहरूले सडकमै टायर बालेर नाराबाजी गरेका थिए।
छपकैयाको इदगाह चोकमा प्रदर्शनकारी र प्रहरीबीच सामान्य झडप समेत भएको थियो। प्रदर्शन उग्र बनेपछि स्थिति नियन्त्रणमा लिन ५ राउण्ड अश्रू ग्यास प्रहार गरेको जिल्ला प्रहरी कार्यालय पर्साका प्रमुख प्रहरी उपरीक्षक सुदीपराज पाठकले जानकारी दिए।
‘प्रदर्शनका कारण केहिबेर तनाव उत्पन्न भएको थियो, अहिले स्थिति नियन्त्रणमा छ,’ उनले भने।
प्रदर्शनकारीले इदगाहचोकमा आगो बालेर त्रिभुवन राजपथ सडक अवरूद्ध गरेपछि वीरगञ्ज महानगरपालिकाको दमकलले आगो निभाएर बाटो सञ्चालन गरेको थियो।
शनिबार धनुषाको धनुकमला नगरपालिका–६,सखुवा मरानस्थित मस्जिदमा अज्ञात समूहले तोडफोड गरेको थियो। सामाजिक सञ्जालमार्फत उक्त घटना फैलिएपछि वीरगञ्जमा पनि प्रदर्शन भएको हो।
प्रदर्शनमा सहभागी अगुवाहरूले तोडफोड गर्नेलाई तत्काल पक्राउ गरी कारबाही गर्नुपर्ने माग राखेका छन्।
जमियतुल उलमा नेपालको केन्द्रीय सहअध्यक्ष एवं यतिमखाना इस्लामिया स्कुल छपकैयाका प्रधानाध्यापक मौलाना अली असगर मदानीले धनुषामा भएको कार्य निन्दनीय भएको बताए। उनले यस घटनामा संलग्नलाई कारबाही हुनुपर्ने बताए।
‘गलत काम भइरहेको छ, प्रशासनले रोक्न सकेको छैन, अन्य प्रदेशमा समस्या हुँदैन, मधेसमै किन समस्या हुन्छ? कुन किसिमको राजनीति भइरहेको छ?,’ उनले प्रश्न गरे, ‘हिन्दु, मुस्लिम, शिख, इसाई, बोद्ध जुन धर्म मानेपनि हामी नेपाली हौं, एक अर्काको धर्म प्रति सम्मान गर्नुपर्छ। त्यसो नगर्ने जो कोहिलाई कारबाही हुनुपर्छ।’
धनुषाको घटनाका बारेमा गृह मन्त्रालयमा मुस्लिम समुदायका अगुवा टोली पुगेर ध्यानाकर्षण समेत गराइसकेको उनी बताउँछन्।
-1767512013.jpg)
-1746009348.jpg)
