शारीरिक अपांगता भएकी युवतीमाथि बलात्कार आरोपमा अछाम रामारोशन नगरपालिका-३ घर भई कैलाली टीकापुर नगरपालिका-१ बस्ने ४० वर्षीय नृप शाह पक्राउ परेका छन्।
उनलाई जिल्ला प्रहरी परिसर ललितपुरले सुर्खेतबाट पुस ७ गते पक्राउ गरेर ८ गते ल्याएको हो। जिल्ला अदालत म्याद थप गरेर अनुसन्धान भइरहेको जिल्ला प्रहरी परिसर ललितपुरका एसपी चक्रराज जोशीले जानकारी दिए।
'बलात्कारको जाहेरी दर्ता भएसँगै हामीले आरोपीलाई नियन्त्रणमा लिएर अनुसन्धान अगाडि बढाएका छौं,' एसपी जोशीले भने।
नृपविरूद्ध ३० वर्षीया युवतीले आफूमाथि बलात्कार गरेको भन्दै पुस २ गते जिल्ला प्रहरी परिसर ललितपुरमा जाहेरी दिएकी छन्।
उनले आफूलाई विवाहको प्रलोभनमा पारेर बलात्कार गरेको जाहेरीमा उल्लेख गरेकी छन्।
कैलाली घर भएकी ती युवतीले आफूमाथि ललितपुर महालक्ष्मी नगरपालिका-५ मा २०८२ मंसिर ११ गते राति बलात्कार भएको जाहेरीमा उल्लेख गरेकी छन्।
उनी शारीरिक रूपमा अपांगता भएकी व्यक्ति हुन्। उनीसँग पहेँलो कार्ड छ। उनले जाहेरीमा उल्लेख गरेअनुसार युवती शारीरिक अपांगता भएकै कारण विवाह नगरी बसेकी थिइन्।
'आफूमाथि विभेद हुने र परिवारको अपहेलना सहनुपर्ने भएकाले विवाह गर्न मानेकी थिइनँ,' युवतीले जाहेरीमा भनेकी छन्, 'तर ६ वर्ष अगाडि चिनजान भएका नृपाको मायाले मेरो सोच परिवर्तन भयो।'
नृप र युवतीबीच ६ वर्षअघि सामाजिक सञ्जालबाट भेटघाट भएको थियो। सामान्य चिनजान हुँदै मिल्ने साथी बने।
नृप वैदेशिक रोजगारीका लागि विदेशमा थिए। सामाजिक सञ्जालमार्फत दिनहुँ कुराकानी भइरहने युवतीले जानकारी दिइन्।
'चिनजानपछि साथी हुँदै विवाहको प्रस्ताव राख्नुभयो,' युवतीले भनिन्, 'मेरो एउटा हात अशंक्त भएकाले आफूलाई पछि धोका दिने डरले प्रेम प्रस्ताव अस्वीकार गरेँ।'
अस्वीकार गरे पनि नृपाले भने आफूले धोका नदिने दाबी गरिरहे।
'शारीरिक रूपमा अपांगता भए पनि आफूलाई फरक नपर्ने भन्दै लगातार पछि लागेपछि स्वीकार गरेँ,' युवतीले भनिन्, 'विवाह गर्ने भनेर मेरो परिवारसँग पनि भेटघाट गर्न आउनुभयो।'
युवतीले आफ्नो परिवारसँग भेटाइन्। तर नृपले भने भेटाएनन्।
'मैले स्वीकार गरेँ पनि परिवारले गर्दैनन्। त्यसले गर्दा हाम्रो विवाह हुन दिँदैनन् पछि भेटौंला भनेर सम्झाइबुझाइ गरे,' युवतीले भनिन्, 'हामी दुईले जिन्दगी बिताउने हो। उसले माया गरे भइहाल्छ नि भनेर सुरूमा कर गरिनँ।'
सुरूआती दिनमा कर नगरे पनि पछि परिवारसँग भेटघाट नगराएपछि आफूले परिवारसँग भेटघाट गराउन जिद्दी गरेको उनी बताउँछिन्।
उनी २०८२ कात्तिक २२ गते नेपाल फर्केका हुन्। नेपाल फर्किएपछि २०८२ मंसिर ५ गते विवाह गर्ने कुरा भयो।
त्यहीअनुसार मंसिर ५ गते विवाहका लागि भनेर आफूलाई ललितपुरको टिकाथलीस्थित डेरामा लगेर मंसिर १२ गतेसम्म साथमा राखेर पटकपटक विवाह गरेको युवतीले जाहेरीमा उल्लेख गरेकी छन्।
'मंसिर १२ गतेपछि मलाई कोठामा छोडी भागेको हो,' उनले जाहेरीमा भनेकी छन्- 'शारीरिक रूपमा अपांगता भएको व्यक्तिलाई प्रलोभनमा पारेर बलात्कार गर्यो।'
शारीरिक अपांगता भएकै कारण मानसिक र शारीरिक रूपमा प्रलोभनमा पारेर आफूमाथि बलात्कार गरेको युवती बताउँछिन्।
युवतीले बलात्कार गरेको आरोप लगाए पनि नृपले भने इन्कारी बयान दिइरहेको एसपी जोशीले जानकारी दिए।
नृपले केही समयअघि अर्कै युवतीसँग विवाह गरिसकेका छन्। त्यसकारण यस घटनाबारे विस्तृतमा अनुसन्धान भइरहेको उनले सेतोपाटीलाई जानकारी दिए।
-1746009348.jpg)
