सल्यानको सिद्धकुमार गाउँपालिका – २ टाकुराका दुई परिवारका नौ जनाको भारत हिमाचलमा भएको आगजनीमा परी मृत्यु भएपछि टाकुरा गाउँ-वडा शोकमा डुबेको छ। घटनापछि मंगलबार वडा कार्यालयदेखि शैक्षिक संघसंस्था बन्द गरिएका छन्।
टाकुरा गाउँकी स्थानीय तथा वडा सदस्य ३० वर्षीया लक्ष्मी विकलाई रोजगारीका लागि हिमाचलमा बस्दै आएका उनका ३१ वर्षीया श्रीमान प्रेम विकले सोमबार बिहान पाँच बजेतिर फोनमार्फत् घटनाबारे जानकारी गराएका थिए।
मृतकमध्ये ३३ वर्षीय धनबहादुर विक श्रीमान प्रेमका कान्छी फूपुका छोरा थिए भने काशिराम विक लक्ष्मीका माइती खलका नाताले भतिजा थिए।
गत वर्ष मंसिरमा मात्रै धनबहादुर र श्रीमती कविता वडा कार्यालयमा आफ्ना नाबालक छोरा राजनको पोषण भक्ताको कागज (कार्ड) बनाएर फर्केका थिए। वडासदस्य समेत रहेकी लक्ष्मीले काममा उनीहरूलाई सघाएकी थिइन।राजनको नाममा पोषणा भत्ता उनीहरूको खातामा जम्मा हुँदै आएको थियो।
‘मेरी आमाजु दिदी श्रीमानले अलि बढी रक्सी खान थाले। कमाएको पैसा त्यसैमा स्वाहा पार्लान्। यी बालबच्चा कसरी पाल्नू! मसँगै भए उहाँलाई सम्झाइबुझाइ गरूली। बालबच्चा पनि सँगै भए खुसी होलान् भनेर नाबालक छोरालाई लिएर श्रीमानका साथ हिमाचल जानु भएको थियो,’ लक्ष्मीले भनिन्, ‘आज उहाँहरूको परिवारको एक जना पनि बचेनन्। वंश नै नाश भयो। यस्तो कहालीलाग्दो घटना सुन्नु पर्दा सम्हालिन मुस्किल भइरहेको छ।’
लक्ष्मीका माइती घर परिवारका नाताले भतिजा पर्ने काशिराम विकका भने सल्यानमै रहेका एक ११ वर्षीय छोरा अभिशेक र हिमाचलमै बस्ने अन्दाजी १२ वर्षीय एक जना छोरा साथीकोमा सुत्न गएको हुँदा जोगिएको उनले बताइन्।
आगजनीमा परी मृत्यु भएका दुई परिवारका नौ जना कसैको पनि शवको पहिचान गर्न सक्ने अवस्था नरहेको श्रीमानले आफूलाई सुनाउको लक्ष्मीले बताइन्।
हिमाचलमा भएको आगजनीमा परी सल्यानको सिद्धकुमार गाउँपालिका – २ टाकुराका दुई परिवारका गरी नौ जनाको भारत मृत्यु भएको थियो।
मृत्यु हुनेमा टाकुराका स्थानीय ३३ वर्षीय धनबहादुर विक, उनकी ३२ वर्षीया श्रीमती कविता विक, १६ वर्षीया छोरी राधा विक, १० वर्षीया छोरी रेणुका विक र २२ महिना छोरा राजन विक एकै परिवारका थिए।
त्यस्तै टाकुराकै ४७ वर्षीय काशिराम बिकसहित उनकी ३२ वर्षीया श्रीमती टीका विक, टीकाकी झट्केली छोरी १२ वर्षीया छोरी अनु विक र काशिराम र टीकाबाट जन्मिएका ७ वर्षीय छोरा किरण विकको पनि आगलागीमा परी मृत्यु भएको छ।
वडासचिव कृष्ण चलाउनेका अनुसार दुई परिवारका नौ जनाको मृत्यु भएपछि मंगलबार वडाभरि शोक बिदा दिइएको छ।
ज्याला मजदुरी गर्न भनेर विगत दुई अढाइ वर्षदेखि दुबै नजिकका नातेदार हिमाचलमा बस्दै आएको लक्ष्मीले बताइन्।
नजिकका आफन्त पर्ने दुई परिवारका नौ जना एकै घटनामा मारिएको खबरले आफू, आफन्त र पूरै वडा शोकमा डुबेको उनले बताइन्।
-1746009348.jpg)
